Home General Arubiano Reinier Koole deteni na Merca relaciona cu caso di asesinato

Arubiano Reinier Koole deteni na Merca relaciona cu caso di asesinato

2385
0
SHARE
~ Koole a presenta dilanti huez diamars mainta ~ Potret: The Palm Beach Post
- Advertisement -

Koole sospecha di a cende trailer na candela cu hende aden

PALM SPRINGS/ORANJESTAD (AAN): Un otro arubiano ta envolvi den un caso hopi serio na Merca. Ta trata di Reinier Koole, kende ta un ex militar arubiano cu a bay Iraq y a retira. For di basta aña e ta bibando na Merca. Na Aruba tambe e hopi conoci pa a bay mishi cu e muraya di KIA.

Potret: The Palm Beach Post

Segun informenan di The Palm Beach Post, tur cos a sosode ora cu a haya Ramon Eduardo Herrera-Moradel  mortalmente hinca pafo di su cas den e area di Palm Springs (Mar-Mak Colony Park).

E website ta menciona cu diahuebs anochi, cinco amigo a reuni den un cas mobil den e area di Palm Springs, pa hunga poker, bebe y consumi cocaina.

Rond di 4:30 a.m., tres di nan a dicidi pa bay un bar. Reinier Koole, kende tabata presente tambe a bay, pero el a coy un otro direccion.

Ramón Eduardo Herrera-Moradel a keda atras. E homber di Lake Worth a bisa cu e ta bay drumi den su auto staciona pafo di e cas mobil pasobra e no tabata sinti bon.

Den lapso di un ora, Herrera-Moradel, di 33 aña, tabata morto (hinca fatalmente, segun e autoridadnan a constata), e cas tabata na candela y Koole a bay.

Dialuna anochi, autoridad di Palm Beach a detene Koole, di 42 aña, di Delray Beach como sospechoso di a cende e cas mobil na candela, mientras cu e compañero di habitacion di su amigo tabata paden. E homber aki mester a wordo trata pa inhalacion di huma.

Diamars mainta un audiencia a tuma lugar y e huez Dina Keever-Agrama a ordena pa Koole permanece cera na e prison di Palm Beach sin posibilidad di fianza. Tambe el a laga sa cu tin mas cargonan cu lo bin, pero no a indica precis kico ta e otro delitonan.

 

ASESINATO

Autoridadnan a haya e curpa di Herrera-Moradel poco prome cu 6 a.m. di diabierna dilanti di e cas mobil (trailer) cu a pega candela na Dolittle Road. El a wordo hinca, pero no tabata tin claridad cu kico el a wordo hinca.

Potret: The Palm Beach Post

Durante e autopsia diasabra, e investigadornan a haya e punta kibra di un flecha (pijl), tira cu un arco, den e  braza di Herrera-Moradel.

Na e momento ey no tabata tin claridad si e flecha tabata e unico arma utiliza den e atake fatal. E amigo di Koole a bisa e  investigadornan cu el a wak un arco y un flecha den e baul di e  Nissan blanco di Koole. E autoridadnan tambe a haya un pistol y un cuchio den e area west di e trailer.

 

CANDELA INTENCIONAL

Paden, e investigadornan a haya sanger  y a nota un recipiente di plastic dirti cu parce tabata tin gasolin. Un investigador experto den candela a determina cu e candela tabata intencional.

E homber cu tabata den e trailer ora cu Koole, segun e informe, a cende na candela, a bisa e autoridadnan cu Koole a bati na e porta diabierna mainta.

“Tin un homber morto dilanti. Tin un homber morto pafo”, Koole (tambe conoci como “Flaco”) a bisa e homber.

E homber a cera e porta. Koole tabata arma cu dos pistol.

Algun minuut despues, e homber a scucha Koole ta core den e hang y a sali di e cas. E homber a habri e porta y a wak e camber di su compañero di habitacion na candela. El a bisa cu a purba di paga e candela, pero no a logra.

E amigo di Koole cu tabata biba den e trailer a bisa e oficialnan cu Koole y Herrera-Moradel tabata tin un disputa despues cu Koole a coy e boter di biña di Herrera-Moradel.

Durante e discusion, Koole a hisa su camisa, mustrando cu e tabata tin un arma na su heup  y a saca un cuchio preto largo. E compañero di camber a bisa cu Koole no a amenaza specíficamente ningun hende y a continua cu e fiesta.

Tambe el a declara cu Koole a aumenta e consumo di cocaina.

Ora cu tur a sali di e cas mobil, e homber a bisa cu el a cera su camber na yabi.

Koole a bisa e investigadornan cu el a bay bek na e trailer pa haya e placa cu nan tabata deb’e. El a bisa cu e tabata sa unda e compañero di camber tabata almacena e placa, esta den un slopi di un cusinchi  y a admiti di a skop e porta di e habitacion di e homber pa hay’e.

E homber a bisa cu e tabata tin $ 40,000 den e slopi.

Koole a nenga di a inicia e candela.

E registronan ta mustra cu Koole tin un caso di robo habri deriva di un incidente na Augustus. Den e informe di detencion, e oficialnan a señala cu nan tabata familiariza cu Koole pasobra den varios ocasion el a wordo forza pa ricibi tratamento pa su salud mental den hospital.

El a wordo declara inocente den e caso ey y tabata den libertad bao fianza na momento di e candela. Keever-Agrama diamars a revoca su vinculo den e caso ey.

Te cu awor esaki ta e informacion y potret cu DIARIO a haya for di The Palm Beach Post.

- Advertisement -

DUNA COMENTARIO

Please enter your comment!
Please enter your name here