Home Gobierno Aumenta cantidad notario, baha suma pa incorpora empresa nobo y registro electronico...

Aumenta cantidad notario, baha suma pa incorpora empresa nobo y registro electronico testament

27
0
SHARE
- Advertisement -

Minister Bikker satisfecho cu a logra:

ORANJESTAD (AAN) — Den conferencia di prensa di gobierno, Diahuebs cu a pasa, Minister di Husticia mr. Andin Bikker a referi na e ley di notario, simplifica e tramitacion pa incorpora empresa nobo y baha e suma pa esaki y ademas e registro electronico di testament cu pronto lo bira un realidad.

LEY DI NOTARIO:

E dignatario a splica, den cuadro di e plan integral di Husticia, refiriendo na e ley cu ta regarda notarionan, cu un siman y mey pasa e tabata den Parlamento relaciona cu e ley aki.

Esaki ta un ley cu ta data di aña 1889 y ultimo biaha cu a wordo adapta ta na aña 1970, cu ainda Aruba tabata parti di e Constelacion Antiyano.

Aworaki e ley a wordo amplia. Cu esaki awor por bay di cuater pa siete notario, y esaki debi cu Aruba a crece y aworaki tin entre 115 mil pa 116 mil habitante registra na Censo, y si tene cuenta cu e indice di notarionan cu ta sirbi na otro paisnan ta m di Reino  ta mas halto, Aruba tin falta di mas notario.

E mandatario a scucha diferente gremio, entre otronan esnan di Real Estate, nan ta indica cu tin hopi traspaso di propiedad cu ta tarda hopi y esaki ta tranca e economia.

INCORPORACION DI EMPRESA NOBO:

E mandatario a indica ademas, cu e tin un combersacion pendiente cu Corte Comun y e notarionan estableci, y e kier haci un intento pa baha e gastonan cu ta wordo cobra ora di incorpora un compania.

El a reitera cu Gabinete Wever Croes kier stimula e companianan nobo pa yuda crece e economia di Aruba, y mester zorg pa e gastonan di incorporacion di un compania nobo bira hopi abao.

Aworaki e ta costa como 2.100 florin pa esaki, y si compare cu Hulanda aya ta 230 euro. Pesey gobierno kier baha e suma y simplifica e tramite mas tanto posible.

Fuera di esey e tin su bentaha huridicamente, pasobra e persona cu ta bay lanta un empresa ta core cierto riesto. Kiermen e por bay bon of menos bon, y den e caso aki pa e riesgonan ta limita. Tin famianan cu ta expone nan bienes ora di lanta un compania, si e empresa no bay bon.

REGISTRO ELECTRONICO TESTAMENT:

Otro tema cu e dignatario a menciona ta e registro electronico di testament. El a reitera e situacion cu tin ora un persona fayece y a laga bienes cu mester wordo reparti entre e herederonan, sea cas of tereno, etc., ya cu mester wak den e registro central na Curacao si tin testament registra, loke hopi biaha no ta e caso pero e ehercicio mester wordo haci ora tin reparticion di bienes, y esaki tambe ta un obstaculo cu innecesariamente hopi biaha ta stanca e economia, pasobra no tin noticia si tin testament of no.

Minister Bikker a reitera y subraya cu el a haci hopi esfuerzo desde cu e tabata den Parlamento, durante e reunionnan tripartite na Curacao y Sint Maarten como tambe na IKO na Hulanda, y awor cu satisfaccion e ta anuncia cu Parlamento a aproba un base legal pa e registro electronico di testament y den futuro lo por wak esaki.

- Advertisement -

DUNA COMENTARIO

Please enter your comment!
Please enter your name here