Prueba di wega politico cu BBO dor di regimen Mike Eman
*Prestamo di 97.5 Miyon mientras a kita 73 Mil di entrada
*Ley pa baha BBO no tabata basa riba estudio cientifico
ORANJESTAD (AAN) — Na 2009 e partido AVP cu Mike Eman na cabes, a dicidi pa un campaña electoral cu mester a pone e partido den gobierno di Aruba. Den un situacion economico internacional y local sumamente peligroso, a lansa e campaña pa baha BBO cu manera por a ser spera tabata tin resultado politico grandi pa partido AVP y sigur Mike Eman cu a bira Minister Presidente.
Rapportnan oficial cu awe DIARIO ta expone tabata indica, cu no tabata tin ningun preparacion serio pa baha BBO di parti di AVP. Ademas na momento cu a baha BBO, cu ta dicidi riba entrada di Aruba mester a baha gastonan di Aruba y sigur e debe nacional.
E ta parce un chiste pero e ta berdad, manera rapport di Raad van Advies ta mustra.
Ora Mike Eman, inmediatamente despues di eleccion 2009, a entrega e proposicion pa baha BBO na Parlamento, e no tabata tin e documentonan cu por a spera pa demostra cu pa Aruba tabata importante pa baha BBO como peso riba forsa di compra di pueblo.
Gobierno Mike Eman no a presenta na Parlamento documentonan importante di instancianan oficial di e pais, cu segun Raad van Advies ta sumamente importante pa dicidi kico ta haci cu BBO den e totalidad di e regimen di belasting na Aruba pero tambe den e totalidad financiero di e pais.
DIARIO for di momento cu BBO a ser introduci na Aruba a mustra cu e forma cu a scoge pa un belasting riba benta di companianan, lo a causa inflacion y afecta comercio y publico cumprado.
For di e tempo DIARIO a basa su mes riba ponencianan y pronosticonan di organonan oficial riba e reforma di ley di belasting y e cambio di belasting directo pa indirecto den un cuadro total di e parti financiero di e pais.
E proposicion di Ley di gobierno Mike Eman cu pa medio di Gobernador a bay e organo mas halto di consulta riba tereno di legislacion, Raad van Advies, a basa su mes riba loke a ser treci dilanti den campaña politico di 2009 di AVP, cu a basa su mes riba cifranan di 2006 di Centraal Bureau voor de Statistiek di Aruba y un estudio di Fundacion Social Cristian Aruba (FESCA) di 3 di october 2008 riba inflacion y e pakete di BBO.
Raad van Advies a rechasa e dos publicacionnan como sosten pa e ley den e presentacion di gobierno Eman cu hasta a exigi Raad van Advies pa duna un contesta dentro di algun dia despues di a ricibi e concepto di ley.
Segun e conseho di Raad van Advies e documentonan di gobierno Eman no por a carga e ley cu tabata exigi cambio di BBO, cu tabata parti di un reforma fiscal den cual a baha belasting directo pa introduci un belasting indirecto.
Na e momento cu gobierno Eman no a introduci un forma pa recompensa e falta di entrada di gobierno, Raad van Advies no por a duna su aprobacion pa baha BBO debi na e resultadonan cu e tabata tin pa gobierno.
Pa entrada di Gobierno baha, mester baha e gastonan pa e pais no a haya su mes den e crisis manera e conoce actualmente.
Si e poder di compra di e ciudadano a ser afecta door di BBO, e ley di BBO no a duna e resultado pa cual el a ser introduci y esey ta nifica cu mester a ahusta e ley loke no a pasa den e documentacion cu gobierno Eman a presenta.
Raad van Advies a bolbe atende cu e forma unilateral di actua di parti di gobierno Eman, cu no a tene cuenta cu e rapport di otro organo di estado cu ta e Conseho Social Economico cu na introduccion di BBO tambe a ser ignora pero a presenta su rapport.
Raad van Advies a pidi gobierno Eman pa bay tuma nota di e posicion di Banco Central, cu tambe a emiti un rapport riba BBO ora e reforma fiscal a tuma luga.
Importante ta e hecho cu e reduccion di BBO lo a nifica mas cu 73 Miyon menos pa e caha di Aruba pa cual segun e presupuesto di minister di Financia mester a haci un debe di 97.5 pa cubri e fayo riba presupuesto, pues e falta di placa cu Aruba tin pa gasta compara cu e gastonan di e pais.
Raad van Advies a rechasa e proposicion pa baha BBO na 2009 debi na e forma cu el a ser presenta dor di gobierno Mike Eman.
Documentonan di Banco Central y di e Conseho Social Economico mescos cu di Camara di Comercio ta rechasa BBO den su forma actual pero tambe ta mustra cu e problema grandi di Aruba ta e forma cu a gasta placa y e debe cu a crea.
DIARIO ta presenta pa Aruba pruebanan pa e desaroyo negativo di economia y situacion financiero di Aruba pero tambe pa e forma con informacion importante no a ser duna na pueblo di Aruba.
