Diego de Cuba lider di STA:
ORANJESTAD (AAN)—Den entrevista cu DIARIO, Diego de Cuba, lider di STA a menciona cu e trahadornan di Arubus kizas no ta mucho contento cu e sindicato, mirando e tardanza cu tin cu nan contrato colectivo nobo.
De Cuba a subraya cu STA semper ta negocia pa bay dilanti y no pa bay atras of keda stanca. Pero mirando e situacion di Arubus nan a bisa cu mester a wanta un rato y warda e cambio di gobernacion.
Aworaki, nan ta sinti cu e momento a yega definitivamente pasobra e ta tumando demasiado tempo caba, pa renegocia e CAO cu tin riba mesa aworaki, cual mester drenta cu forza retroactivo for di 1 di Januari di e aña aki.
Tin un protocol riba mesa aunke tin un par di punto cu gerencia a diferencia di opinion, pero ta puntonan cu no ta mucho problema pa discuti na mesa y resolve pa yega na un acuerdo.
De Cuba a splica cu un protocol semper ta importante prome cu cuminza negocia un CAO, pasobra den dje tin tur e reglanan di wega.
“Semper sindicato STA ta boga pa esaki, pa evita cu na caminda, ora cosnan tranca, por tin problema. Si tin e reglanan di e wega y trece e protocol riba mesa, a base di locual tin acorda den e protocol aki bo ta sigui padilanti den e negociacionnan”, Diego de Cuba a subraya.
Esaki ta un di e partinan mas importante cu a palabra cu gerencia di Arubus. Tambe el a splica e gerencia cu minister Chris Romero a bisa STA cu dia 1 di April lo tabata tin un director nobo pa Arubus. Despues el a yame bise cu tur cos ta practicamente cla, pero e persona en cuestion mester pasa den onderzoek door di Departamento di Seguridad di Aruba, cual tur e personanan cu ta bay asumi un responsabilidad asina halto den un compania estatal, mester pasa den dje.
Diego de Cuba ta kere cu despues di Dia di Obrero lo bin haya sa ken lo bira e director nobo di Arubus.
Mientras tanto STA ni su delegadonan na Arubus no sa ken e persona aki ta, pasobra e no a wordo divulga pa gobierno ainda. Locual De Cuba a subraya ta cu STA kier mira e caranan contento bao e trahadornan na Arubus, atrobe, pasobra ultimamente e frustracion ta grandi cerca e trahadornan aki.
El a subraya cu Arubus ta un bon compania pero mester ta sincero cu Dios y cu cada ken su mes, y tur hende mester cumpli cu su tarea y cu e reglanan di e compania, debidamente. Esaki semper STA ta vocifera na tur su miembronan den tur compania. Nan ta bringa pa e trahadornan nan bienestar, pero tambe nan tin nan debernan pa cumpli cune den e compania.
Den e compania tin algun persona cu tin mester kizas di un psicologo, cu tin problema por ta hasta financiero, y cu e gerencia nobo mester atende cu e aspecto humano aki tambe, y STA lo yuda tambe den esaki.
