Home Politica Benny Nisbet ta haya cu falta hopi informacion di e $180 miyon...

Benny Nisbet ta haya cu falta hopi informacion di e $180 miyon cu a desaparece

293
0
SHARE
- Advertisement -

ORANJESTAD (AAN): Segun Benny Nisbet di Partido PPA, e informacion di  Ministro Presidente Evelyn Wever-Croes cu US$180 miyon destina pa Citgo Aruba NV a desaparece, a sacudi comunidad. Sabiendo cu centenar di trahador a perde trabao y cu e futuro Upgrader lo ta casi nihil, un declaracion asina merece mas informacion al respeto.

Falta hopi informacion pa cu e declaracion di Ministro Presidente, pesey PPA a saca algun pregunta publico al respeto:

(1) E  fondo aki a worde manda pa Citgo Aruba NV dor di kende: Citgo Petroleum of PDVSA of Banconan di cual nan por a haci un prestamo?

(2) E fondo aki a drenta Aruba, esta e accountnan di Citgo Aruba NV of e fondo aki nunca a yega Aruba?

(3) Y si acaso e no a yega Aruba, pa unda e fondo aki a worde manda?

(4) Si el a yega Aruba, con bin un suma grandi asina por desaparece pa hopi tempo asina?

(5) Den pasado, cierto momento e gerencia di Citgo Aruba NV a worde kita y un gerencia nobo a worde apunta door di PDVSA Holding, doño di Aruba NV y aparentemente miembronan di e gerencia di Citgo Aruba NV y di otro companianan den exterior a worde yama pa Venezuela pa reunion cu gobierno Venezolano, na unda nan a worde aresta.  Esaki por tin algo di haber cu e desaparicion di e suma gigantesco aki?

(6) Ora Ministro Presidente Wever-Croes declara cu e ta spera cu e desaparicion aki lo no tin nada di haber cu ex-Ministronan di e gobierno Eman anterior, kico  Ministro Presidente  realmente kiermen?  Tin mas informacion cu Ministro Presidente pa un of otro motibo no kier publica ainda?

(7) Nos a comprende cu un miembro di Parlamento Hulandes (Bosman) a puntra of sugeri na Ministro Presidente Wever-Croes, pakico no a haci keho na Ministerio Publico ainda?

(8) Un biaha mas e desaparicion aki di un suma asina grandi a tuma lugar of di Aruba esta Citgo Aruba NV of el a disparce prome cu el a yega Aruba?

PPA ta sinti cu mas informacion mester worde duna na pueblo. Fuera di esey PPA ta haya hopi straño cu ningun miembro di parlamento di Aruba no a bula aden haciendo preguntanan oficial na Gobierno di Aruba/Ministro Presidente.

Hopi straño cu parlamento ta den un silencio riba un suma grandi asina  cu a desaparece sea na Aruba of na caminda pa Aruba, esta Citgo Aruba NV.

(9) Y kico e informacion aki ta nifica pa e futuro Upgrader, esta Citgo Aruba NV?

(10) Cuanto trahador a perde nan trabao pa motibo di e desaparicion di e suma di $180 miyon, y cuanto mas lo perde trabao segun gobierno di Aruba?

PPA ta di opinion cu una vez Ministro Presidente Evelyn Wever-Croes a declara ‘A’ lo e mester declara ‘B’ tambe relaciona cu e desaparicion di un suma asina grandi.

Pueblo tin derecho riba mas informacion al respecto. Finalisando e declaracion cu e pregunta mayor: Di con nos Parlamento ta den un silencio hermetico al respeto?

- Advertisement -

DUNA COMENTARIO

Please enter your comment!
Please enter your name here