Home General Bureau Rampenbestrijding a lanza plataforma digital pa atende cu calamidad

Bureau Rampenbestrijding a lanza plataforma digital pa atende cu calamidad

73
0
SHARE
- Advertisement -

Aruba prome den Caribe cu ta lanza RAVEN, ademas di Merca y Australia

ORANJESTAD (AAN): Diaranzon mainta, na Bureau Rampenbestrijding (BRA) na Wayaca a tuma lugar e lanzamento di e plataforma digital cu lo atende cu crisis na Aruba. E plataforma aki yama ‘Raven Emergency Management Platform’.

Pa e ocasion aki a conta cu presencia di Robert (Bob) Toups, Chief Operating Officer di Worldwide Incident Command Services Corporation di Merca cual ta un partner hopi importante pa Aruba pa loke ta e implementacion di e software aki cu lo yuda atende cu cualkier calamidad di un forma mas precis y mas lihe.

Toups tabata hopi entusiasma di por a introduci e tecnologia aki na e isla di Aruba. El a duna di conoce cu Aruba ta e prome isla den Caribe cu ta cla pa implementa RAVEN, ademas di Merca y Australia.

Nan ta un ‘Non-Profit Organization’ , cu base na California y nan meta ta pa duna support na otro paisnan pafo di Merca ariba tereno di maneho di emergencia. Nan ta traha di un manera exitoso, a bisa, na otro paisnan cu a incorpora e mesun tecnologia aki.

Prome Minister Evelyn Wever-Croes tambe tabata presente y el a bisa cu esaki tabata un momento special.

Bureau Rampenbestrijding, a indica, tin basta tempo trahando na un forma con pa por maneha crisisnan mas efectivamente. BRA ta conoci como un instituto cu ta prepara trainingnan pa asina Aruba por ta prepara pa cualkier calamidad.

Den cuadro di e plannan di e-government, BRA a bay busca un sistema pa digitaliza e proceso di maneha un crisis. Asina nan a yega na e tecnologia aki di RAVEN.

Tin trainingnan ta tumando lugar aworaki duna pa expertonan cu participacion di diferente instancia pa asina por ta mihor prepara pa atende cu crisis.

Esaki no solamente ta un ehempel di ‘e-government’, pero tambe di ‘e-crisis management’, e mandatario a expresa, cual na un manera digitaliza y mas eficiente pa maneha crisisnan cu por bin den cualkier circunstancia.

E software aki lo permiti BRA reacciona di un manera mas lihe y mas efectivamente. Lo sa miho unda e problema ta, cual ta e caminda cu tin cu cera of tin cu habri, unda mester bay prome of evita di bay. Ta un manera mas safe pa atende cu crisis, Wever-Croes a indica.

COSTO

Rino Hermans, director di BRA a duna di conoce cu pa pais Aruba e costo di esaki lo ta solamente e uso di internet. E software aki a wordo desaroya pa e ‘crisis management’ den vloer y desaroya pa un ‘non profit organization’ cu ta yudando henter mundo.

Esaki ta un software cu ta yuda analiza, mitiga y maneha e crisis. E ta duna tambe cualkier informacion cu gobierno, of cualkier departamento di gobierno ta desea. “Nos ta update y tur hende ta haya un mapa di con e situacion ta na Aruba”.

Si ta papia di beachnan cu ta wordo afecta, e ta eyriba, a bisa.

Pa lanza e plataforma, Prome Minister Evelyn Wever-Croes ta e persona cu a pone e prome ‘incident comment post’ y asina por a mira con for di California a haya mesora asistencia.

Na momento cu na Aruba no tin experticio ariba un incidente, awor por haya e experticio aki for di rond mundo. Si ta un incidente cu Aruba no por ‘handle’ pasobra no tin e experticio ey akinan, awor tin e experticio aki den forma digital pa medio di un ‘app’, 24 ora pa dia, henter aña, Hermans a enfatiza.

E proximo stap ta cu lo mester di e ‘satellite box’  pa conecta na internet y e ora lo tin henter mundo accesibel.

Rino Hermans a bisa DIARIO, cu a tuma tres aña pa yega finalmente na e implentacion di e plataforma aki na Aruba di locual e ta hopi satisfecho.

- Advertisement -

DUNA COMENTARIO

Please enter your comment!
Please enter your name here