Home arte y espectaculo Centro di Actividad di Fundacion Rancho ta anuncia tayer di tambu

Centro di Actividad di Fundacion Rancho ta anuncia tayer di tambu

83
0
SHARE
- Advertisement -

ORANJESTAD (AAN) – Gineli Quandt, Coordinador di Centro di Actividad Rancho, a duna di conoce den un encuentro cu prensa, cu nan ta bay ofrece un tayer di tambu.

E hoben a menciona cu esaki ta hopi importante, pasobra no tin mucho hoben cu ta practica e parti aki di Aruba su herencia musical.

Sra. Quandt a splica cu e tayer aki ta bay cuminza na Mei proximo, ta bay enfoca riba con pa toca tambu y tambe den e parti di baile, e aspecto di herencia y e funcion cu tabata tin, entre otro.

Como coordinador di actividad di Fundacion Rancho, sra. Quandt ta sinti su mes hopi orguyoso cu nan ta bay duna e tayer aki, mirando cu nan ta den e bario pa conserva e cultura di Rancho, y tambu ta parti di dje.

El a mustra e buki “Caya di Monchi” unda tabata tin fiesta y nan tabata toca tambu den e temponan aya.

E ta haya cu lesa e buki aki ta sumamente importante pasobra e ta papia di e ofishi y tradicion di tambu na Aruba. El a invita e pueblo di Aruba pa participa di e tayer aki, pasobra e ta algo unico cu ta bayendo perdi, y mester keda mantene. Por inscribi na e centro di actividad mes, den horario di oficina. Tin un suma envolvi pa cubri gastonan di e material cu lo wordo uza den e tayer y pa algo pa refresca durante e tayer.

E tayer ta cuminza dia 4 di Mei y ta ocho siman di les. E ta termina dia 22 di Juni venidero y lo tuma lugar tur diasabra for di 4 di Mei. E ta bay ta den e centro di actividad mes, di 4’ or di atardi te 6 or di anochi.

Mester yena e formulario di participacion pa por garantiza esaki tambe, ya cu esaki ta parti di e administracion cu mester hiba. E ta invita tur hende pa no perde chens di participa den e tayer aki. Aworaki tin lugar pa 10 persona mirando cu e espacio no ta mucho grandi. E tayer ta conta cu sosten di Departamento di Cultura y den futuro e lo sigui.

 

- Advertisement -

DUNA COMENTARIO

Please enter your comment!
Please enter your name here