Home General Citgo: AVP tabata estupido of di mala fe?

Citgo: AVP tabata estupido of di mala fe?

1937
0
SHARE
- Advertisement -

Analisis

Historia ta wordo skirbi for di e gobierno di AVP, hasta despues cu na urna electoral na 2017 pueblo di Aruba a manda nan cas.

No para keto solamente na e lider di AVP, Mike Eman, cu aparentemente na luga di colecta stampia a dicidi di colecta voto.

AVP como partido, como fraccion di Parlamento, como Gobierno a comete actonan cu segun leynan cu ta dicidi riba funcionamento di Aruba, ta castigabel. AVP a habri su mes pa conforme Statuut, cu ta exigi bon gobernacion di Aruba, pasonan ser tuma contra su gobierno pero tambe su parlamento cu a sigui sostene su gobierno y e partido cu no a actua.

AVP pa gana eleccion na 2009 a hunga cu sentimentonan y necesidad di Aruba y a baha BBO sin haci un bon estudio y na mes momento a bay haci un prestamo cu awor a causa un crisis na Aruba.

AVP a bay cera un deal cu Nicolas Maduro, cu ya a pone Venezolanonan na careda y tabata destrui Venezuela, pa introduci un proyecto pa rehabilitacion di refineria di Aruba.

AVP a bay busca 300 Miyon cerca Nicolas Maduro cu tabata hipoteca Citgo pa e haya placa pa e proyecto cu nunca a wordo habri mientras economia y financia di Aruba a ser sufri un caida casi fatal.

E pregunta cu ta surgi awor cu tur carta ta riba mesa ta, si ta estupidez of mala fe a pone AVP hinca Aruba den e desgracia grandi cu Aruba ta actualmente.

Si ta estupidez ta causante di e problemanan cu AVP den su totalidad a crea pa Aruba den ocho aña di tempo, mester cuminsa cuestiona diplomanan di representantenan di AVP cu ta yama nan mes intelectual y a cumpra curason di votadonan cu supuesto sabiduria.

Uno tabata mas sabi cu otro y pa nan papia cu pueblo, nan mester di scenarionan sofistica cu mester impresiona pueblo cu nan importancia.

E lider di AVP ta biaha di un pais pa otro y ta uza tur oportunidad cu e por haya, pa hunga intelectual.

Titulo, carera, diploma di miembronan di AVP awe ta spart for di otro den cara di Aruba cu ta puntra su mes cu si no tabata estupidez, no mester ta mala fe cu a causa loke AVP a produci pa un Aruba cu tin hasta berguensa di loke prensa internacional ta presenta.

Tur instancia oficial a adverti AVP, cu a haci loke e tabata kier contra tur regla y ley.

Awe e placa cu Maduro mester a manda Aruba a disparce. Trahadonan cu a bira victima di engaño ta perde trabou na Citgo.

Awe mester acusa AVP, su lider, su miembronan di Parlamento, dirigentenan di e partido di a abusa di Aruba. Mester acusa AVP di tabata di mala fe y conscientemente a destrui Aruba.

Historia lo mustra dede riba AVP como e pio gobernacion cu Aruba por a conoce.

 

 

 

- Advertisement -

DUNA COMENTARIO

Please enter your comment!
Please enter your name here