Home Comentario Cu un opresion yegando su maximo expresion, Venezuela ta bibando su “hora...

Cu un opresion yegando su maximo expresion, Venezuela ta bibando su “hora 25”

71
0
SHARE
- Advertisement -

Comentario:

Pa Mercedes Monge

E escritor Constantin Virgil, a skirbi un novela basa riba hechonan y horornan cu a sosode durante e di dos guera mundial den cual e ta papia di e “opresion di e ser humano, den su maximo esplendor” y ta desaroya un historia, verdaderamente tristo y sensitive.

Mirando e situacion actual di Venezuela, unda sin duda e opresion di e ser humano ta den su maximo expresion, bon por bisa cu Venezuela ta bibando su “hora 25”.

E Republica Bolivariano di Venezuela ya caba ta hopi lacera: un pais cu un rikeza sin limite, cu a conta cu un capital humano hopi profesional den tur campo, y vooral riba tereno petrolero, cu pa hopi aña tabata un pais cu hopi hende tabata kier bay biba cu e meta di progresa y di hecho un di e paisnan cu mas imigrante a conoce, a partir di e di dos guera mundial, awendia a bira un ruina social, moral, economico y financiero. Un ruina den acceso na atencion medico, utilidad y servicio, alimentacion, etc. Un pais hundi den un abismo di miedo!

Pesey ta un pais cu asina tanto tonalidad di raza, di hende di tur latitud, kizas manera ningun otro na America Latina.

Hopi yamada e lidernan di oposicion a cuminza pa haci na un comunidad, desprovisto di herment pa defende su mes, na un reflexion trankil, locual no a duna resultado, y despues a yama na manifestacionnan pacifico cu tampoco a resulta door di e opresion cu e gobierno ta eherce, usando incluso manipulacion di gruponan cu nan mes ta paga pa busca problema, incluso uza bala y herida cualkier inocente, pa desestabiliza cualkier intento contra e sistema.

Na e momentonan aki realmente ta poco informacion e medionan internacional ta treciendo dilanti, ta parce cu e pueblo di Venezuela cu kier bringa contra coriente, a cuminza navega contra tur speranza. Un presidente cu ta cera caminda hasta di paisnan bisiña manera nos islanan aki, causando un situacion indesea pa e parti di comercio y tambe riba e ambito politico, aunke den e sentido aki nos gobierno ta hopi keto of kizas prudente.

Tambe esaki ta crea un situacion penoso pa tur e personanan cu ta wordo haya ilegal ta traha or tey cu intencion di keda, y cu ta deteni pa wordo deporta. Pa mihor cu e trato di Warda Nos Costa por duna nan, e no ta e situacion mas ideal pa sernan humano experiencia.

Ainda tin hende (algun residente Venezolano na Aruba) cu ta indica nan deseo pa un intervencion externo tuma lugar. Tal, nan desesperacion ta, pasobra nan tin famia na Venezuela cu nan lo a desea di trece Aruba, pero obviamente nan no por. No tur ta desea tampoco wak un ser keri bin akinan cu un status di ilegalidad.

Asilo politico no ta posible sin mas, manera hopi di nan ta kere cu mester ta. Pa nan e leynan Hulandes por sona irazonable, pero no ta asina. Realmente nos pais mes tin su problemanan di diferente indole, y no por acapara un cantidad grandi di Venezolano, no obstante nos curazon tin cu bringa cu nos razon.

Dios yuda nos pais bisiña pa wak e luz na final di e tunel, pasobra ainda e scuridad ta grandi y no ta mira un salida, alomenos no inmediato.

- Advertisement -

DUNA COMENTARIO

Please enter your comment!
Please enter your name here