Home Enseñanza DEA a presenta e Plan Educacion Nacional 2030 na stakeholdernan

DEA a presenta e Plan Educacion Nacional 2030 na stakeholdernan

63
0
SHARE
- Advertisement -

ORANJESTAD (AAN): Diabierna dia 12 di april Departamento di Enseñansa Aruba tabata tin e honor pa presenta e Plan Educacion Nacional (PEN) 2030 na stakeholdernan di sector social, economico y di medio ambiente.

Na final di aña 2017 Minister di Enseñansa sr. dr. A.R. Lampe a encarga Departamento di Enseñansa Aruba (DEA) cu e Plan Educacion Nacional: PEN 2030. Meta di e Nationaal Onderwijsplan “PEN 2030” ta pa hunto cu tur stakeholder yega na un vision comun pa Educacion na Aruba.

Durante e atardi aki sra. Sheila Maduro, Hoofd Onderwijskundige Zaken di Departamento di Enseñansa Aruba a elabora tocante e proceso pa yega na e plan. E proceso aki a encera consultanan cu diferente stakeholdernan, pa asina nan por a duna nan contribucion na e vision nobo pa Educacion na Aruba. Tambe a organisa actividadnan pa intercambia pensamentonan tocante calidad, innovacion y best practices den Enseñansa.

Como punto di salida a uza e General Education Quality Analysis Diagnosis Framework (GEQAF), di UNESCO. Tambe a uza un analisis SWOT di e Nationaal Onderwijs Plan 2007-2017 y Enseñansa. Pa duna docentenan e oportunidad di vocifera nan opinion, a tene un encuesta digital.

Na mes un manera comunidad tambe a contribui na yega na e vision di PEN 2030. Expertanalyses a wordo teni na diferente ocasion unda directivanan di scol, Inspectoria di Enseñansa hunto cu Departamento di Enseñansa a evalua e sitiacion actual di Educacion y e rumbo cu nos kier tuma como pais.

Durante e ronda di consulta pa cabesantenan di tur scol na Aruba, na nan turno a haya e oportunidad di vocifera nan puntonan di atencion pa Educacion y e elementonan cu nan lo kier den e vision pa Educacion 2030.

Educacion ta concerni nos tur, y pesei ta asina importante pa traha hunto cu stakeholdernan pafor di Educacion pa asina nos conhuntamente logra e metanan. E sectornan pafor di Educacion a duna nan perspectiva riba e rumbo cu nos pais mester tuma pa asina acopla cu desaroyonan nacional y internacional.

Durante e presentacion akinan Sra. Maduro a trece varios topico padilanti e.o. desaroyo di Enseñansa mundial y na Aruba, habilidad necesario, puntonan di atencion pa enseñansa y vision di Educacion 2030.

Ademas a toca e tema di e cuadro di calidad cu ta encera meta di desaroyo, resultadonan desea, procesonan primario, fuentenan nucleo y mecanismo di sosten.

Sra. Maduro a amplia tocante e resultadonan cu a bin di tur e actividadnan. Kico ta e puntonan di bista cu a bin dilanti di parti di e stakeholdernan interno y externo y e buraco cu tin y con pa yena esaki.

Tambe a papia tocante e mision, balornan, vision nobo, metanan strategico, puntonan clave di cada meta strategico y con lo bay di plan pa accion. Tambe a elabora tocante e situacion di Enseñansa actual y e situacion desea y con pa yega na esaki

Ministerio di Enseñansa y Departamento di Enseñansa Aruba kier a haci uzo di e oportunidad aki pa gradici tur stakeholder cu a contribui pa realisa PEN 2030.

 

Pa mas informacion por acudi na nan website [ea.aw] y busca PEN 2030. Tambe por sigui desaroyonan relaciona cu Enseñansa na Aruba a traves di facebook, twitter y Instagram @educationaruba.

 

- Advertisement -

DUNA COMENTARIO

Please enter your comment!
Please enter your name here