Home Hudicial Defensa di abogado a convence Hues pa declara sospechoso di tira liber

Defensa di abogado a convence Hues pa declara sospechoso di tira liber

387
0
SHARE
- Advertisement -

Mientras cu Fiscal a exigi 12 luna di prison

ORANJESTAD (AAN): E homber S.K. a para riba cu e no tin nada di haci cu e asunto di tira riba 13 di Augustus 2018. Fiscal si ta haya S.K. culpable y a exigi 12 luna di prison. Abogado mr. S.Kock su defensa a convence Hues cu no tin ningun prueba contra S.K. Hues no ta haya S.K. culpable y a declar’e liber.

Despues di 6 luna sera den KIA como sospechoso, S.K. ta worde declara liber.

E acusacion cu Fiscal a presenta den Corte contra S.K. ta cu riba 13 Augustus 2018, e tabatin un arma di candela y a tira cu esaki. S.K. ta desmenti categoricamente.

    TIRA CU MENAZA:

Hues a bisa Polis a worde manda San Miguel caminda persona a menaza otro. Polis a papia cu e personanan. Na un otro apartamento Polis a haya benta pafor un huls di un arma.

Polis por a compronde cu un dama L. tabatin apartamento pa huur. Na Juli 2018 a huur y despues e persona E. a reclama cu e apartamento no ta bon. Despues na Augustus 2018 a surgi un problema caminda E. kier a ataca L. Dilanti Polis, L. a bisa E. cu e por haya su deposito si e bandona e apartamento e momento ey. E. no a bandona e apartamento.

Despues tabatin un discusion caminda S.K. a bisa E. cu e lo mat’e. L. a yama Polis. El a tende discusion pero no a tende tiro. E muher M. a bisa cu 13 Augustus 2018 e tabata na cas y L. a bay pa cobra huur. El a tende un dama cu ta biba den un otro apartamento a presenta na e apartamento di M. y tabata pidi L. pa e placa di deposito. L. a sera e porta di e apartamento.

E mama di S.K. tambe a bay eynan y tabata bati na porta pa habri porta. L. a bisa M. pa no habri e porta. E señora a bisa cu si su yiu bin e no ta para responsabel pa loke el a haci. El a bisa cu e yiu no tin miedo di bay sera y lo tira. M. a mira via bentana S.K. ta cana bin y a bisa pa habri porta. M. a bisa cu el a yama Polis.

S.K. via bentana di cushina a drenta e apartamento y L. a core drenta den baño. S.K. a bati na porta di baño. Despues S.K. a core sali for di e cas. Un rato despues a tende un tiro. Hues a bisa cu tin diferente testigo cu a bisa cu a mira e discusion y a scucha un sonido parecido na tiro di un arma di candela. Tin un persona cu a sigura cu el a scucha un tiro cu ta di un arma.

   SOSPECHOSO TA DESMENTI:

S.K. a bisa Hues cu si acaso el a tira, lo mester a haya polvora riba su man y a haya DNA di dje riba e huls. El a bisa cu e tin 6 luna sera pa sospecho di arma di candela pero no ta berdad.

El a bisa Hues cu el a bin Aruba back pa haya rijbewijs pa e bay back Hulanda pa e drecha su bida aya. El a remarca, di con no a haya prueba cu polvora cu su man.

   EXIGENCIA DI FISCAL:

Fiscal a bisa cu e S.K. no ta desmenti loke a pasa na e apartamento di M. El a admiti di a drenta den e apartamento y a bay bati na porta di baño caminda L. tabata scondi. E ta desmenti di a tira. Fiscal ta haya cu esaki no ta corecto.

Na opinion di Fiscal, tin 4 testigo a bisa cu un rato despues di e discusion a tende un tiro di un arma di candela. Un testigo a sali pa mira kico a sosode y a mira S.K. core bay. Polis a haya un huls banda di e apartamento di M. Tin imagen di security-video cu ta mustra cu un homber ta core bay. Segun Fiscal, aunke e imagen ta leu, por reconoce S.K.

Fiscal a bisa Hues cu Polis tabata busca S.K. pero el a sconde. Despues di 1 luna a haya S.K. y no por a tuma muestra for di man pa polvora di tiro. Fiscal ta haya legalmente proba cu S.K. tabatin arma riba 13 Augustus 2018 y a los un tiro. Fiscal a exigi 12 luna di prison, kitando e tempo cu S.K. tabata sera den KIA.

   DEFENSA ABOGADO:

Abogado mr. S.Kock a bisa Hues cu for di momento di detencion di S.K., S.K. a desmenti cu e tabatin un arma di candela. Semper el a keda mantene su declaracion. Na opinion di mr. S.Kock, for declaracion di testigonan, ningun por bisa cu a mira S.K. of cualkier persona tira. E hecho cu a haya un huls no ta indica cu ta di S.K.

E mama di S.K. a bisa cu e motibo cu S.K. tabata eynan tabata pa los e boter di gas pasobra e mama tabata mudando. S.K. tabatin un pipe wrench color cora den su man. E abogado a bisa Hues cu Polis no a haya ningun arma. No a haci ningun investigacion riba e huls pa determina ki tipo di arma a usa, cuanto tempo e huls tabatin ey bou benta.

E hecho cu e mama di S.K. a bisa cu S.K. lo tin un arma, no kiermen cu S.K. tin un arma. E abogado a menciona cu tabatin un caso di tiramento banda di un school caminda tabatin muchanan hungando. Despues Ministerio Publico a declara cu no tabata arma sino un pick up a back fire. E abogado a mustra cu e mama di S.K. a bisa cu e sonido ta di un brommer cu a back fire. Ariba e video di seguridad a mira un brommer a pasa. E simpel hecho cu a mira S.K. core bay, no ta bisa nada.

E abogado a bisa Hues cu S.K. a core bay pasobra e tabata laat pa bay back traha. E abogado ta haya cu no tin suficiente prueba cu S.K. tabatin un arma. El a mustra cu den pasado S.K. tabata deteni pa posibel arma, pero el a worde laga liber pasobra no tin nada. E abogado ta haya cu S.K. mester worde declara liber pa loke e ta worde acusa di dje. E abogado a bisa Hues cu S.K. tin chens pa forma parti di Formacion Social cual e kier bay haci y esey a cuminsa 1 April 2019. El a pidi Hues pa tene cuenta cu esaki.

Fiscal a reacciona cu e situacion na school ta completamente diferente. No a haya huls y a resulta cu ta e muchanan a gaña.

   SOSPECHOSO DECLARA LIBER:

Hues a sera tratamento di e caso y a dicta sentencia di biaha. Hues no ta haya legalmente proba cu S.K. lo tabatin un arma y a los un tiro. Hues a bisa cu hende a tende tiro y el a sona manera un arma di candela.

Hues a sigui bisa cu manera abogado a bisa e por ta un back fire di un brommer. Ningun hende a mira hende a tira y no a investiga e huls pa determina si ta un huls fresco. Hues a conclui cu no ta legalmente proba cu S.K. a tira cu un pistol. E hecho cu S.K. a core bay no ta prueba convicente. Hues a declara S.K. liber.

Riba e potretnan aki por mira na Augustus 2018, ora cu Polis tabata investigando e lugar di crimen na San Miguel.  Tambe por mira imagen di e huls haya na e cas.

 

- Advertisement -

DUNA COMENTARIO

Please enter your comment!
Please enter your name here