Home Parlamento Delegacion di Staten lo participa den Sesion Plenario di Tweede Kamer na...

Delegacion di Staten lo participa den Sesion Plenario di Tweede Kamer na Hulanda

72
0
SHARE
- Advertisement -

Tocante e tema situacion di Venezuela:

ORANJESTAD (AAN) – Un delegacion di Parlamento di Aruba, ta bayendo Hulanda, y den entrevista cu Presidente di Staten mr. Ady Thijsen, el a splica e motibo di e viahe di trabao aki.

Dos tema principal e Parlamentarionan pa traha na Hulanda. Un di nan ta bolbe bolbe elabora riba e tema di Geschillenregeling, y un amienda cu a wordo presenta na 2012 y a keda acepta, pa bin cu un instancia apart pa duna conseho ora tin diferencia di opinion ora ta wordo aplica articulonan di statuto.

E di dos tema importante, ta e situacion di Venezuela, mirando cu den Tweede Kamer ta bay tin un sesion plenario tocante esaki.

Presidente di Parlamento a comenta cu e situacion di Venezuela cada dia ta empeora y bira mas serio y e ta haya na su lugar atende e asunto aki como prioridad.

E parlamentario a menciona cu nan a caba di bin di Bruselas unda e delegacion di Staten a papia cu e Comision di Union Europeo, unda nan tin fondonan disponible pa e region, incluyendo Aruba, y nan a cana e caminda aki hunto cu Corsow pasobra e situacion ta duna cu nan mester di ayudo financiero.

El a menciona cu Hulanda ta duna ayudo tecnico y sosten, pero pa loke ta finanzas semper nan ta bisa cu ta un asunto interno, pero Corsow y Aruba no ta di acuerdo cu nan y den varios ocasion a papia cu nan al respecto, pasobra esaki ta un asunto di Reino y mester yuda e islanan aki. Si nan por a yuda Colombia cu 4 miyon Euro pa e situacion aki, tambe por yuda e partnernan di Reino, pero e ta keda na nan, segun mr. Thijsen.

El a agrega cu importante ta cu Tweede Kamer ta tuma e situacion di Venezuela hopi na serio, y ta sigui e desaroyonan hopi di cerca, y nan ta bay bin cu un sesion plenario unda ta bay tin un debate hopi pisa, y Aruba, Corsow y Sint Maarten lo bay ta presente y lo papia cu nan for di prome caba, den e Comision di Asuntonan di Reino.

Di e comision permanente di Aruba sr. Thijsen mes ta bay duna un presentacion exacto atrobe, di con e situacion ta na Aruba, kico ta e problema y peticionnan cu Pais Aruba tin.

Corsow y Sint Maarten tambe lo duna nan presentacion, mr. Thijsen a indica.

E Presidente di Parlamento a expresa cu tur esnan cu ta siguiendo e situacion na Venezuela sa, cu ta yegando momento cu algo ta bay pasa y Aruba mester ta prepara pa semper salvaguardia e derecho y bienestar di nos hendenan.

Thijsen a subraya cu Aruba como partner di Reino Hulandes y mester por asumi tambe su responsabilidad como pais cu tin un democracia sano y un estado di derecho, y den e contexto aki Aruba ta parti di tratadonan internacional cu ta toca e derechonan fundamental di e ser humano y esaki tambe mester wak con Aruba ta bay cumpli cune, ya cu ta un obligacion cu Aruba tin.

E parlamentario a subraya cu bay Hulanda pa e Sesion Plenario aki ta un prioridad y un necesidad cu nos pais tin.

- Advertisement -

DUNA COMENTARIO

Please enter your comment!
Please enter your name here