Home General Dia 23 di April: Dia Mundial di Buki y Derecho di Autor

Dia 23 di April: Dia Mundial di Buki y Derecho di Autor

21
0
SHARE
- Advertisement -

ORANJESTAD (AAN) – Diamars 23 di April: un dia hopi importante na henter mundo y sigur pa Aruba, ya cu ta trata di e Dia Mundial di Buki y Dia di Derecho di Autor. Y banda di esaki ONU tambe ta celebra e Dia di Idioma Spaño.

Esaki ta un fecha den cual UNESCO ta sigui fomenta e cultura di lesamento y e propiedad intelectual pa medio di e derecho di autor.

Tabata na aña 1995, cu e Conferencia General di UNESCO celebra na Paris, a dicidi di rindi un homenahe universal na e buki y autornan riba e fecha cu dos gran autor di e Literatura Universal a fayece: Miguel de Cervantes y William Shakespeare; no obstante cu e fecha di nan fayecimento a crea un movecion atravez di tempo, debi na exactitud historico y cambio di e calendario Juliano pa esun Gregoriano.

Atravez di e fecha aki UNESCO ta alenta tur hende, y specialmente e hubentud, pa descubri e placer di lesa buki y balora e contribucion iremplazable di esnan cu a impulsa e progreso social y cultural di e humanidad.

Awo, na 2019, ta wordo celebra e di XXIV edicion di e Dia Mundial di Buki y Derecho di Autor y enfasis lo wordo poni riba e literatura y lectura dirigi na mehora y proteha e lenganan indigena.

Manera ta conoci UNESCO ta sumamente comprometi cu e pueblonan Indigena, desde e adopcion di e Derechonan di e Pueblonan Indigena na September 2007, y ta sigui traha pa logra mas reconocimento di e derechonan aki.

Pero tambe UNESCO, awe mas cu nunca, ta reafirma su boluntad di yuda y sostene e comunidadnan local den su esfuerzonan pa promove y preserva su conocemento di Idioma, por cierto un tema cu Minister di Enseñanza Rudy Lampe a enfoca durante un conferencia di prensa, den cual a menciona e lugar cu UNESCO ta dunando na nos Idioma Papiamento.

E bukinan ta un vector di conocemento cu ta reuni famianan rond di un historia, y nan ta un patrimonio comun, alavez cu nan ta revela aspectonan specifico mediante diferente cultura, identidad y idioma. E enfoke e aña aki, ta den linea cu e celebracion di e Aña Internacional di Lenganan Indigena.

Un dato interesante ta cu e Capital Mundial di Buki di UNESCO 2019 ta Sharjah, capital di un di e Emiratonan Arabe Uni cu ta cuminza su mandato awe, dia 23 di April.

Masha pabien na tur autor y muy specialmente e autornan Arubano y sigur tur esnan cu ta skirbi na Papiamento.

RECORDANDO JOSSY MANSUR:

Aki, como un homenahe postumo, breve aunke e merece mucho mas, nos ta recorda e gran escritor Jossy Mansur, cu no solamente a skirbi novelanan na Spaño y Ingles sino cu a duna un sosten na e Idioma Materno Papiamento atravez di e storianan bunita, su famoso Historia di Aruba tanto na Papiamento como na Spaño, su diccionario den cinco idioma, unda Papiamento ta central y hopi hopi mas.

Sin lubida e storianan clasico pa mucha cu el a traduci na nos dushi Papiamento. Y sin duda su editorialnan como director di DIARIO, cu no solamente tabata un placer di lesa pa su Papiamento corecto pero su contenido cu semper a laga un marca den e consenshi di pueblo en general, y di tur esnan cu a haya nan mes refleha. Jossy Mansur sin duda un gran escritor Arubiano!!! Y entre tur su obranan esun di mas grandi y mas completo ta su propio corant MATUTINO DIARIO!

Pabien tambe na e comunidad di habla Spaño residente na Aruba ya cu ONU ta honra awe, e bunita idioma aki, cu tambe ta universal.

- Advertisement -

DUNA COMENTARIO

Please enter your comment!
Please enter your name here