Home Hudicial Dialuna Corte Superior lo trata caso homber cu a mata e muchanan...

Dialuna Corte Superior lo trata caso homber cu a mata e muchanan Eugene y Rishandroh

131
0
SHARE
- Advertisement -

ORANJESTAD  (AAN) – Dialuna 15 April 2019 mainta, Corte Superior lo trata e apelacion di Gabriel Martien, kende a wordo condena na 15 aña di prison pa maltrato severo y mata e rumannan Eugene di 3 aña y Rishandro di 5 aña. Ministerio Publico a yama e caso aki “Speeltuin”.

Dia 20 di Februari 2019 e caso a bin dilanti pro forma y a keda palabra cu dialuna awor, 15 April 2019 e tratamento ta tuma lugar. E acusacion cu Procurador General a presenta na Februari 2019 contra Gabriel ta cu entre September 2017 y November 2017, el a maltrata e muchanan Eugene y Rishandro cu consecuencia cu nan a fayece.

Tratamento di e caso aki a sosode aña pasa caminda Gabriel a admiti di a maltrata y mata e muchanan. E caso aki a bin na claridad ora cu dia 22 November 2017, e mucha Rishandroh a yega hospital pa tratamento y dokternan a constata cu e mucha ta victima di maltrato severo. Polis y Voogdijraad a wordo notifica y nan a papia cu e mama R.F., kende a bisa cu Rishandroh a cay for di glijbaan pero Polis no a kere esaki. Rishandroh a fayece.

Investigacion a mustra cu ta Gabriel tabata maltrata e muchanan cu consecuencia cu tur dos a fayece. Despues di interogacionnan a bin haya sa cu Gabriel a mata Eugene y der’e. Recherche a bin haya e curpa di Eugene. 

TRATAMENTO OBLIGATORIO

Dia 6 Juli 2017 Hues a dicta sentencia caminda Hues a splica cu mester busca un balance den castigo y e seguridad den comnunidad. El a mustra cu a keda constata cu Gabriel ta sufri di problema mental serio.

Ademas di tin e tendencia anti social, e ta sufri tambe di “schizophrenia”. Psychiater y psycologo ta considera cu Gabriel ta leve no responsabel pa su actonan. Nan ta bisa tambe cu ta teme cu Gabriel lo por bolbe ripiti loke el a haci. Den pasado Gabriel no a tuma tratamento, ora el a wordo bisa pa haci esaki.

Psychiater y psycologo ta di opinion cu mester obliga Gabriel pa haya tratamento. Nan ta recomenda pa pone Gabriel na disposicion di Gobierno (TBS), pa asina e haya tratamento obligatorio.

Hues ta haya cu mester haci esaki pa evita cu den futuro, Gabriel lo bolbe haci algo lamentable asina.

Hues a splica cu segun ley, pa hendenan cu problema mental cu a mata hende, e TBS no conoce un periodo maximo. Esey ta nifica cu te ora constata cu e persona no ta causa un peliger pa comunidad, e lo por sali for di e instituto. Sino e lo keda interna den e instituto. 

CASTIGO

Teniendo tur ariba menciona na cuenta, Hues a bisa cu e ta haya parti di exigencia di Fiscal na su lugar. Hues a condena Gabriel na 15 aña di prison. Hues no ta haya oportuno pa awor aki impone e parti condicional ariba e castigo aki tambe.

Hues a mustra cu actualmente na Aruba y den Antiyas no tin un clinica TBS. Ta buscando manera pa habri un clinica TBS na Curacao. Esey ta encera, cu despues cu Gabriel sinta 10 aña di prison, e lo por cuminsa cu e tratamento obligatorio den un institucion.

Hues a ordena cu si no tin un clinica den Antiyas, a base di ley, Gobierno lo mester busca clinica na Hulanda pa Gabriel haya e tratamento obligatorio.

Dialuna awor, DIARIO lo ta den Corte pa cubri e caso y informa lectornan di tur loke a sosode den sala di Corte di Husticia di Aruba.

- Advertisement -

DUNA COMENTARIO

Please enter your comment!
Please enter your name here