Home Hudicial Discusion entre Fiscal Hulandes y abogado riba “cultura di fia placa” den...

Discusion entre Fiscal Hulandes y abogado riba “cultura di fia placa” den un compania

202
0
SHARE
- Advertisement -

Durante tratamento di un caso di malversacion

ORANJESTAD (AAN):Siman pasa DIARIO a publica e caso penal contra dos dama den un hotel pa malversacion di mas cu 40 mil Florin. Un di e damanan, hefe di cahera, durante tratamento di e caso a bisa Hues cu tabatin un cultura di fia placa y ta door cu e otro dama no a paga back e placa cu el a presta, a cuminsa un caso penal.

   FISCAL REACCION RIBA CULTURA:

Matutino DIARIO a haya interesante e discusion cu e surgi entre Fiscal y abogado mr Schipper riba e expresion “cultura di fia placa”. Ta asina cu e Fiscal Hulandes, por cierto un di e Fiscalnan cu a atende e caso IBIS, aparentemente no a keda contento cu tin abogado den e caso IBIS a expresa cu e agentenan Hulandes cu Ministerio Publico a usa pa investiga e caso, no conoce e cultura di Aruba y pesey a interpreta cosnan robez.

Fiscal a reacciona riba e expresa di e dama sospechoso cu a bisa cu tin un “cultura di fia placa”. Na opinion di Fiscal e dama ta papia di un cultura di fia placa pero esey no ta e caso. Pesey e hotel a laga haci investigacion. Fiscal a reacciona riba e asina yama “cultura”. El a bisa Hues cu den caso IBIS tambe tabata papia di cultura.

Fiscal a bisa cu e ta interpreta cultura e costumbernan di tradicion di Aruba manera, pastechi, etc. El a sigui bisa cu por ta e ta interpreta robez. Fiscal a bisa cu den e caso IBIS, a bin critica cu Macamba a interpreta robez e cultura. Na opinion di Fiscal, esey ta un pensamento robez. El a splica cu segun ley, si coy placa sin tin autorizacion esey ta malversacion. E ta haya cu ta despues di tres interogacion, e dama a bin admiti.

    ABOGADO TA REACCIONA:

Abogado mr. Schipper na su turno a bisa Hues cu e opinion di Fiscal riba cultura, e ta haya cu Fiscal ta bruha caso IBIS cu loke ta e cultura den e compania caminda su cliente tabata traha. E abogado a bisa Hues cu su cliente a splica cu tabata un costumber cu tabata fia trahadornan placa y cu nan ta paga back. Loke a pasa ta cu e persona, e otro dama sospechoso, no a paga back.

E cliente tin duele cu el a worde usa door di e otro dama. Na e trabao conoce e costumber cu ta fia placa na trahadornan cu mester paga back. Esey ta e cultura di fia placa cu tabata biba den e compania.

E abogado a sigui bisa cu e ta haya cu Fiscal a keda sin investiga e costumber aki y Fiscal ta haya cu su cliente ta culpable y ta compara un cos cu otro cu no ta na su lugar. E abogado ta haya cu Fiscal no por compara e trahador cu ex minister.

For di e discusion aki por mira claramente cu e Fiscal Hulandes kier a expresa su mes riba e critica di abogado den e caso IBIS y abogado mr. Schipper a cuestiona esaki pasobra no por compara caso IBIS cu e caso di malversacion aki.

Manera DIARIO a publica, tanto Ministerio Publico como Paul Croes y dos abogado, representando nan cliente, a apela e sentencia caso IBIS. Ta spera cu e aña aki mes lo por cuminsa cu e apelacion. E pregunta cu ta bin ta, Procurador General tambe lo bay vocifera e expresion di Fiscal tocante e critica riba di no conoce e cultura di Aruba?

Dia di tratamento di e caso esaki, lo bay haya sa si ta asina of no.

 

- Advertisement -

DUNA COMENTARIO

Please enter your comment!
Please enter your name here