Home General Dunadornan di trabao tambe tin cu cumpli cu ley laboral ora situacion...

Dunadornan di trabao tambe tin cu cumpli cu ley laboral ora situacion di compania no ta bon

40
0
SHARE
- Advertisement -

Hopi trahador ta wordo perhudica:

ORANJESTAD (AAN) — FTA ta preocupa pa cierto desaroyonan cu ta tumando lugar den e mercado laboral di sector priva.

Den entrevista cu e lider sindical sr. Hubert Dirks el a menciona cu tin algun compania, tambe den sector di hotel, cu na momento cu un trahador yega na cierto edad, alavez cu e compania no ta haciendo ganashi, nan ta cambia di structura.

Lamentable ta cu e companianan aki no ta pensa riba e trahador cu a contribui tanto aña pa e empresa gana e placa cu el a gana den e transcurso di tempo ey.

Nan no ta duna e trahador e balor cu e merece, y si no ta pa e cesantia, por ehemplo, e ta bay cas sin nada. Y den caso cu no por aplica pa e ley di cesantia, e dunador di trabao ta haci todo por todo pa keda sin paga e trahador.

Dirks a menciona cu hopi biaha e trahador ta bira malo y hasta muri, y e famia ta keda sin ningun entrada no importa tur e añanan cu e trahador a haci esfuerzo grandi pa aporta na e compania.

El a bisa cu esaki ta un mentalidad robes y abuso contra e trahador, mientras cu pa ley tanto e trahador como e dunador di trabao mester cumpli cu ley.

E lider sindical a subraya cu mester tene cuenta cu e negoshi ey ta di tur dos. Un cu ta inverti placa den e compania y esun cu mester traha, unda tur dos mester beneficia y no un banda so.

E dunador di trabao mester tene cuenta cu e trahador tin su famia y ta bon pa na momento cu e situacion ta bay malo tin espacio pa reconoce e trahador.

Sr. Dirks a subraya cu mester tin inspeccion di e leynan y cu esaki no ta keda solamente na Departamento di Labor. Tin diferente departamento di Gobierno, manera Belasting, DTI, Brandweer, Departamento di Economia cu tin nan leynan y por controla si esnan cu ta traha bao e leynan aki, ta respeta nan.

Si esey no pasa, caminda ta keda habri pa abuso, e sindicalista a expresa. Tin casonan cu mester bay caminda di Corte, no obstante sr. Dirks ta di opinion cu na luga di esaki, na momento cu no tin cumplimento, ta ora e trahadornan mester subi caya.

El a subraya cu mester concientiza e trahadornan cu e ultimo arma mester wordo uza cu mas frecuencia, pa asina trece e balansa y e respet bek y compronde cu ora di papia di un desaroyo esaki mester ta pa tur, y tur hende mester cumpli cu ley.

Tin un caso cu ta andando pa mas cu dos luna caba cu ta un tienda bon conoci, cu aunke e trahadornan no ta afilia na FTA su abogado ta tratando nan caso, y sr. Dirks a indica cu si den e caso aki no cumpli cu ley, no ta e trahadornan so ta wordo perhudica, pero tambe gobierno pa motibo cu no ta haya e entradanan cu mester ricibi, y e concurencia inhusto entre e doño di trabao y su trahadornan unda tin algun cu ta wordo paga hasta bao di salario minimo.

E lider sindical ta puntra ta ki sorto di pais nos kier, si no ta cumpli cu leynan? Di parti di FTA nan ta haci nan esfuerzo y ta dialoga hopi, pero ta yega momento cu mester tuma otro posicion, cu e lo desea pa tume hunto cu e trahadornan y e sindicato lo trata e caso na un forma hopi skerpi riba e actitud di e dunador di trabao y di gobierno, sr. Dirks a conclui.

 

- Advertisement -

DUNA COMENTARIO

Please enter your comment!
Please enter your name here