Home Economia Durante Februari 8 di 12 sector a registra subida di prijs

Durante Februari 8 di 12 sector a registra subida di prijs

20
0
SHARE
- Advertisement -

Segun datonan di Oficina di Estadistica

ORANJESTAD (AAN):  E CPI pa luna di Februari 2019 ta 123.16, loke ta representa un subida di 0.6% compara cu e indice di Januari 2019 (122.49) y acumulando un subida di 0.1% te cu na Februari di e aña aki.

E cambio di e CPI pa e ultimo diesdos (12) lunanan (Februari 2018 te cu Februari 2019) ta 3.7%, un subida di 1.8 ppt compara cu e periodo corespondiente di aña pasa (1.9%).

E promedio anual di e tasa di inflacion pa e periodo di Februari 2018 te cu Februari 2019 ta 3.7%, un subida di 4.2 ppt compara cu e -0.2% registra den e periodo di Februari 2017 te cu Februari 2018.

Durante e luna aki, ocho (8) di e diesdos (12) sectornan a registra subida di prijs. E subidanan cu tabata tin e mayor efecto riba e CPI a wordo registra pa e sectornan di “Transporte” (1.8%) y “Cuminda y bebida no-alcoholico” (0.9%), causando un efecto di 0.32 y 0.13 ppt, respectivamente. E subidanan den e restante sectornan a contribui cu un efecto di 0.14 ppt riba e CPI di Februari 2019.

E subidanan aki a wordo contraresta parcialmente door di principalmente un caida den e indice di e sector di “Recreacion y cultura” (-0.4%), cu a contribui cu un efecto di -0.03 riba e CPI di Februari 2019. E caida den e sectornan restante a contribui cu un efecto insignificante riba e CPI di Februari 2019.

EFECTO ARIBA TRANSPORTE

E subida den e sector di “Transporte” a wordo causa principalmente door di un subida den e categoria “Servicio di transporte” (24.0%), causa principalmente door di un subida di 36.8 den “Pasashi di avion”, causando un efecto di 0.26 ppt.

E subida den e sector di “Cuminda y bebida no-alcoholico” a wordo causa principalmente door di un subida di 0.9% den e categoria “Cuminda”, causando un efecto di 0.13 ppt.

E caida den e sector di “Recreacion y cultura” a wordo causa door di caida den e categorianan “Ekipo audiovisual, fotografico y pa procesamento di informacion” (-2.8%) y “Otro articulo y ekipo pa recreacion, hardin y animal domestico” (-1.1%), causando un efecto di -0.03 ppt cada uno.

CANASTA BASICO

E canasta di consumo di e CPI ta consisti di 452 bienes y servicionan. Compara cu Januari 2019, 49.8% di e bienes y servicionan aki a conoce un aumento di prijs causando un efecto di 0.90 ppt, mientras cu 19.2% ta mustra un subida di prijs, cu a contribui cu un efecto di -0.35 ppt y pa e restante 31.0% no tawata tin cambio den prijs. Prijsnan di bienes a subi cu 0.4% na Februari 2019 y a causa un efecto di 0.22 ppt riba e CPI di Februari 2019. Prijsnan di servicionan a conoce un subida di 0.9% y a causa un efecto di 0.33 ppt.

E CPIC (core inflation) – CPI excluyendo e efecto di energia y cuminda – a registra na Februari 2019 un subida di 3.1%, cu ta 2.7 ppt mas halto compara cu e periodo corespondiente di aña pasa (0.4%).

E indice di energia – cu ta consisti di e productonan: electricidad, awa, gasolin y diesel a registra un subida di 3.9%, cu ta 7.3 ppt mas halto compara cu e periodo corespondiente di aña pasa (-3.4%). E indice di cuminda a registra un subida di 9.1%, cu ta 7.8 ppt mas halto compara cu e periodo corespondiente di aña pasa (1.3%).

BESTAANSMINIMUM

E bestaansminimum pa un hogar consistiendo di dos (2) adulto y dos (2) mucha (edad 0-14 aña) na Februari 2019 ta Afl. 4,638, mientras cu pa un hogar di un (1) adulto e suma ta Afl. 2,208.

- Advertisement -

DUNA COMENTARIO

Please enter your comment!
Please enter your name here