Home Gobierno E ta denuncia Janga, Kock, Faneyte y Kamperveen di Lotto pa Deporte...

E ta denuncia Janga, Kock, Faneyte y Kamperveen di Lotto pa Deporte pa corupcion

221
0
SHARE
- Advertisement -

Minister Dangui Oduber dispuesto pa paga multa:

ORANJESTAD (AAN) — Minister Dangui Oduber,  a sigui menciona, den conferencia di prensa, cu despues cu e pruebanan contra e Hunta di Supervision di Lotto pa Deporte a bin dilanti, un di e “abusadornan” a entrega su retiro pasobra su consenshi a remorde.

Un vez cu esaki a sosode Gobierno a nombra un miembro cu nan a introduci na e otro miembronan, y alavez a pidi nan encarecidamente, mirando cuanto prueba di mal maneho, corupcion y fraude pa nan, na un manera profesional, entrega nan retiro mesora, y wak si como hende grandi nan ta dispuesto na coopera cu esaki, y si nan no ta dispuesto e minister lo denuncia tur e informacion aki y menciona cada un nan nomber, pa ora nan cana den comunidad, cada deportista wak nan den nan cara y puntra nan kico nan a haci cu tur e fondonan cu ta wordo genera for di benta di Lotto pa Deporte.

Na lugar di esaki e hunta directiva a paga nan consehero huridico cu ta esun di mas caro cu tin den Reino Hulandes, y a manda un carta pa gobierno den cual nan ta repasa tur loke e minister a trece dilanti, y ta menace, purba di silenci’e y prohibi’e di papia y a referi na un sentencia di aña pasa unda Huez a prohibi su persona di stroba y perhudica e hunta di haci su trabao.

E Huez a bisa e mandatario cu si e ta stroba nan pa haci nan trabao e ta bay cobre un multa como minister, vigente entrante 4 di April.

E dignatario a nombra e personanan concerni, y a expresa cu si e tin cu paga e multa e ta pague for di awor te ora e caba di paga, cu keda sin denuncia tur e fechoria y corupcion cu nan ta aproba como miembronan di e Hunta di Supervision di Lotto pa Deporte.

El a menciona e personanan di Silvio Janga, Elio Kock, un meneer di fam Faneyte cu ta traha na Elmar, y un meneer Kamperveen.

“Kiermen, ningun hende ta bay stroba mi, silencia mi di bisa comunidad kico tur ta pasando den Lotto pa Deporte. No por ta asina cu e placanan aki ta bay directamente den saco di e miembronan aki, y tur facilidad cu ta den Beheer di Facilidad Deportivo, a wordo afgekeurd”, e dignatario a subraya.

El a comenta e hecho cu e Seleccion di Aruba mester a participa den wega di futbol na Corsow, loke a costa gobierno 40 mil florin, pasobra nan no por a hunga na e compleho Juan Figaroa ni den Guillermo Prospero Trinidad, pasobra CONCACAF a afgekeurd e veldnan aki, ya cu nan no ta cumpli cu e rekisitonan basico pa weganan internacional.

Ora cu e seleccion a cobra gobierno e 40 mil florin, nan a mande pa Lotto pasobra nan ta suppose di mantene e facilidad, y Lotto a contesta cu nan no ta bay pague.

Pero no solamente e dos complehonan deportivo menciona ta den mal condicion, sino tur otro ta den mal estado. E dignatario ta bay publica tur e pruebanan den prensa, cu e tin pasobra ora e ta denuncia algo ta pasobra e tin prueba!

 

- Advertisement -

DUNA COMENTARIO

Please enter your comment!
Please enter your name here