Home Editorial Editorial: Biba Rey!

Editorial: Biba Rey!

51
0
SHARE
- Advertisement -

Despues di hopi aña, dia 30 di april 2013, Reino Hulandes a saluda su Hefe di Estado nobo cu e palabranan “Biba Rey”.

E monarca nobo no tabata un desconoci pa paisnan den Reino. For di edad hoben cu frecuencia e tabata bishita e islanan Hulandes den region di Caribe. E forma cu e tabata presenta su mes a aporta na e lasonan special cu Aruba a mantene cu Reino Hulandes

E prome miembro di e Cas Real di Hulanda cu a bishita Aruba tabata Princesa Juliana y for di e momento trono Hulandes a haya un cara stima na Aruba. E relacionnan entre Aruba y Cas Real a wordo fortifica dor di e lasonan directo cu miembronan di Cas Real.

Como hoben princesanan tabata bishita Aruba. Princesa Sonrisa tabata nomber di Princesa Beatrix, kende como Reina a comparti alegria y dolor di Aruba na un forma personal.

Dia 27 di april 1967 Aruba hunto cu henter Reino Hulandes a hubila ora a ser anuncia cu un prins a nace y cu despues di tres generacion Reino tabata tin un Prins Heredero.

Willem-Alexander Claus George Ferdinand for di 30 di april 2013 a drenta historia como Koning der Nederlanden, Prins van Oranje Nassau, Jonkheer van Amsberg.

Cada monarca, ta pone un stempel diferente riba e historia di Reino. E prins hoben a permiti e islanan di Caribe mira su desaroyo personal y humano durante su bishitanan.

Mescos cu henter Reino, Aruba tambe tabata curioso ken e lo a scoge pa bira Reina.  Grandi tabata e sorpresa ora e prome indicacion a wordo duna, cu e futuro Rey lo a dicidi cu un dama di Argentina un dia lo a bira e futuro Reina.

Esaki a nifica cu e continente Americano a entrega Reino Hulandes un Reina, cu tambe a gana nos curason.

Ta den tempo di hopi cambio e futuro Rey a wordo prepara pa su tarea y su responsabilidad pa bienestar di cada ciudadano Hulandes.
E bon ehecucion di Statuut, reconoci como e miho areglo estatal entre paisnan den Reino, ta exigi atencion pa cambio den prioridad di e Monarkia Constitucional Hulandes.

For di momento cu Princesa Juliana a saluda pueblo di Aruba personalmente pa prome bes, Corona Hulandes a haya e impresion directo di ciudadanonan Hulandes den region di Caribe cu ta parti di su responsabilidad como monarca.

Cu e palabranan “Biba Rey” Aruba ta saluda y felicita su monarca awe. Un expresion cu ta brota for di e curason Arubano, den cual tin un luga special pa nos Cas Real.

Hunto cu henter Aruba awe DIARIO ta expresa su miho deseonan na nos Rey. Bendicion y forsa pa e por sigui cumpli cu su tarea. Felicidad personal den su seno familiar, nos Cas Real stima.

 

 

- Advertisement -

DUNA COMENTARIO

Please enter your comment!
Please enter your name here