Home Editorial Editorial: Desaroyonan mundial ta exigi planificacion economico nobo

Editorial: Desaroyonan mundial ta exigi planificacion economico nobo

59
0
SHARE
- Advertisement -

Semana Santa 2019 a distingui su mes pa nos region pa e cantidad di desaroyonan importante cu a registra. A ser demostra cu e region Caribense y Latino Americano mester ser prepara pa un epoca nobo den cual paisnan liber lo bay trata na cera porta pa mas situacion estilo Venezuela.

Pa e proximo simannan, ehecucion di plannan importante mester ser spera y manera nos a adverti, nan lo trece cambio pa Aruba tambe.

For di aña pasa nos a mantene un linea di pensamento cu mester cuminsa diversifica economia na Aruba. Nos a papia di pasonan cu mester ser tuma a base di mas actividad economico online cu ta afecta negoshinan chikito di Aruba, cu a mantene semper e base economico di e pais.

Nos a defende e empresanan chikito cu a keda dunado di trabou y sostenedo di nos economia den situacionnan di crisis na e pais, cu no tin realmente luga pa companianan gigante pa su tamaño fisico y comercial.

Mientras nos a mustra cuanto espacio tin riba diferente tereno economico, Camara di Comercio a bolbe presenta su plan pa haci Aruba un centro comercial den nos region.

Awe cambionan importante den nos region, ta sostene e idea di diversificacion y sigur di e “hub”,  un centro di actividad economico diversifica na Aruba. Nos tin tur motibo pa a base di informacion cu nos ta colecta y analisa, sostene e introduccion urgente di un centro comercial na Aruba cu un posicion geografico historia cu tabata e motibo pa Lago a bira realidad den pasado.
Desaroyo di plannan di Union Europeo, cu kier bay presta mas atencion na nos region,  a ser anuncia manera nos a indica directamente despues cu e anuncio oficial a ser haci na Europa.

Nos mester mira e plannan nobo pa Venezuela y e atencion nobo di paisnan liber pa nos region y e cooperacion di mundo liber pa fortifica comercio liber den nos region.

E plannan di Guaidó ta basa riba comercio liber y oportunidadnan ta habri pa Aruba, cu a sufri dor di e desaroyonan di Venezuela, restaura su economia.

Guaidó tin un plan. Merca tin plan. Union Europeo tin un plan. Aruba mester di un plan pa expande su economia y nos ta sigui duna sosten na rapportnan cu a mira luz den pasado y awor mester ser realisa.

Nos ta papia aki di e plan di Camara di Comercio pero tambe informacion sumamente valioso di e Conseho Social Economico cu mester bay ocupa nan luga den nos comunidad atrobe.

Nos mester biba cu resultadonan di pasado. Nos mester paga e debe nacional cu a ser crea pa nos y nos futuro generacionnan. Nos mester yena e buraco di un pilar economico,  refineria, cu a bira nos caida final na 2018.

Nos mester bandona ayera y nos mester uni pa planifica futuro di Aruba sin perde tempo. Den e futuro aki no solamente placa cu ta drenta caha di gobierno ta importante, pero na prome luga e placa cu ta drenta cahanan di mundo empresarial.

No mester lubida cu ta mundo empresarial ta e dunado di trabou principal den e sistema democratico y na mes momento ta duna gobierno placa pa por paga su gastonan di personal cu den nos situacion mester baha den cantidad.

Cu urgencia Aruba mester bini hunto pa planifica su economia nobo a base di desaroyonan cu ta anuncia nan mes.

- Advertisement -

DUNA COMENTARIO

Please enter your comment!
Please enter your name here