Home Editorial Editorial: Dia di Trabou transforma talento personal den produccion nacional

Editorial: Dia di Trabou transforma talento personal den produccion nacional

33
0
SHARE
- Advertisement -

Nos mundo moderno conoce un problema grandi. Mundo a bira facil y ta keda facil te na momento cu coriente bay, nos telefon nenga di transmiti tur nos mensahenan y nos mente y curpa wordo forsa di activa.

Mas invento subi e lista di gran descubrimentonan,  mas ciencia ta adverti contra inactividad di hende cu a ser crea pa traha pa asina maneha mundo riba tur tereno. E participacion di cada persona segun talento den comunidad, ta conduci na un pueblo feliz pero tambe directamente na e bienestar personal.

Trabou ta cambia un soño den esfuersonan nobo. E mente humano ta reconoce retonan cu bida ta contene. E ta spierta mainta cu e animo pa enfrenta tur loke e mester confronta pa realisa loke el a pone su dilanti.

E ta haci esfuersonan pa realisa loke e kier. E por ta un forma nobo pa cultivo cu ta duna cosecha. E por ta un receta nobo den man di un mama cu mester produci cuminda saludabel pa su yiunan cu poco recurso. E por ta gerente di un compania grandi cu ta maneha entrada di tanto empleado. E por ta un maestro cu ta descubri un forma mas facil pa muchanan logra domina un materia complica.

Esfuerso pa realisa un plan, ta tene un hende ocupa na forma positivo y ta crea semper perspectivanan nobo. Crecemento personal ta e resultado. Satisfaccion ta yena un persona, cu a lucha pa alcansa un logro. Su exito ta bira exito di su famia y di su comunidad.

Ciencia moderno ta mustra cu e falta di sentido di ta util, di satisfaccion, di logro ta kita for di hende e sentidonan mas positivo di bida y hasta e sentido di dignidad y balor propio.

Si e parti material di esfuersonan  deshaci di e parti di sentimento humano, hende y comunidad ta bira robot ambulante. Placa por bira facil loke ta acomoda corupcion y criminalidad cu ta afecta felicidad di comunidad pero tambe di e ser humano.

Historia di Aruba ta un ehempel di e balor di trabou duro. Cunucunan di famia cu mester a produci cuminda. Piscadonan riba lama bruto.  Comerciantenan cu  traha di mainta pa anochi. Mamanan ocupa cu educacion di nan yiunan y tabata inventa formulanan pa economisa pa nan yiunan por a habri caminda den bida y crea e comunidad Arubano di awe.

Aruba mester uza e inspiracion di su historia pa awe e yuda e generacion nobo y entrega hobennan e hermentnan mas importante di un ser humano. E satisfaccion y alegria di mira solo baha despues di un dia di trabou productivo. E cansancio cu ta cera wowonan anochi pa por confronta un dia nobo.

Awe Aruba ta den un crisis. Pero awe tambe Aruba ta papia di construccion di un economia nobo.

Aruba ta traha plannan pa sigui lucha y sigui traha.

Awe nos ta invita Aruba pa ban descubri retonan nobo. Ban transforma nos talentonan den produccion nacional.

Nos ta pidi bendicion pa tur esfuerso pa hunto nos traha riba nos futuro. Nos ta  propone un brindis pa trabou como e instrumento pa soño bira realidad y propositonan positivo bira logro nacional y exito personal.

Pabien awe na e pueblo cu a lucha y construi e pais cu ta nos orguyo, Aruba!

- Advertisement -

DUNA COMENTARIO

Please enter your comment!
Please enter your name here