Home Editorial Editorial: Gobierno Mike Eman mester responde acusacionnan serio

Editorial: Gobierno Mike Eman mester responde acusacionnan serio

97
0
SHARE
- Advertisement -

Despues cu eleccion 2017 a pone un fin na e regimen Mike Eman na Aruba, pueblo di Aruba a cuminsa sinti e peso di traicion dor di politiconan cu el a duna su confiansa.

Ora na 2009 Aruba a pone Mike Eman na poder, hamas Aruba por a pensa cu el a entrega mando di su pais na un gobierno, cu lo a trapa riba su leynan, su bienestar y su futuro pa e por a crece y realisa su soño a costo di e pais.

Awe Aruba mester grita traicion ora rapportnan oficial ta mustra kico a haci cu placa di Aruba, cu ta hoga den un crisis cu ta kita pan for di boca di trahadonan cu a kere den e promesa di un riu di oro. No tin nomber pa describi e dolor di tanto cas na Aruba, cu a bira victima di e traicion di Mike Eman y su complicenan den gobierno y parlamento.

Un berdad amargo ta ser registra pa votadonan cu na 2009 a kere cu di berdad e gobierno di Mike Eman tabata traha pa bienestar di e luga aki y a guli e comedia di un politico den welga di hamber cu ta uno di e cortinanan di huma cu el a uza pa abusa di e confiansa di votadonan.

Awe documentonan cu a bay perdi den e teatro di traicion Eman, ta bolbe mira luz y no por bolbe bay perdi sin cu Mike Eman, su gobierno y su sosten mayoritario den Parlamento responde pa acusacionnan serio di organonan oficial.

DIARIO a mustra con e maximo autoridad di control di placa di pueblo, Algemene Rekenkamer Aruba, ta acusa gobierno Eman di ta gasta placa contra reglanan hancra den ley di e pais. Na un forma directo e gobierno di Mike Eman ta ser acusa di a viola reglanan legal pa gasta placa di pueblo, cu awe ta victima di un crisis cu el a provoca manera documentonan oficial ta ilustra.

E ta responsabel pa e situacion cu a haci cu na 2015 Hulanda a actua y a exigi pa cambia e maneho financiero di Aruba y cu a haci cu e mester a busca un cortina di huma pa sconde e situacion serio cu e pais tabata aden y cualkier momento por a rementa den su man.

Na 2015 Hulanda entre otro a expone e realidad di e famoso proyectonan PPO cu Aruba no por a controla debidamente pa medio di su presupuesto pasobra tabata tin participacion di empresanan priva cu no tabata limita na Aruba ni na interes Arubano. E “tram” por duna un indicacion di e futuro sin rumbo cu Eman a habri pa Aruba.

Citgo, e baca di lechi di Nicolas Maduro na Merca, a bira e instrumento grandi pa regimen Mike Eman confirma su traicion di Aruba. Documentonan oficial ta papia di e forma cu el a kibra areglonan legal pa mara Aruba na un acuerdo cu Nicolas Maduro pa asina destrui e posibilidad pa Aruba por a crea un economia sano mientras pa motibo di Nicolas Maduro turismo di Aruba a cuminsa cay.

Parlamento di Aruba mester habri caminda pa e acusacionnan contra gobierno Mike Eman ser atendi na Aruba pero tambe den seno di Reino cu a base di Statuut mester garantisa nos orden di Ley.

Mike Eman tabata bon na haltura cu si e tabata den Parlamento awe, e lo mester a enfrenta e mayoria nobo den sala di parlamento.  Pafo di Parlamento e por sconde tras di su sirbidonan den partido AVP, cu a forma su coro mayoritario den Parlamento pa destrui Aruba.

Como matutino di pueblo di Aruba nos a cumpli y lo sigui cumpli cu nos tarea. Palabra ta na Parlamento di Aruba cu manera tur instancia oficial ta ilustra, mester duna muestra cu e ta vigila interes di Aruba.

- Advertisement -

DUNA COMENTARIO

Please enter your comment!
Please enter your name here