Home Editorial Editorial: Nos deseo pa un Pasco Grandi di bendicion y...

Editorial: Nos deseo pa un Pasco Grandi di bendicion y speransa nobo

27
0
SHARE
- Advertisement -

Un aña sumamente dificil y turbulento ta separa nos di Pasco Grandi 2018 y Pasco Grandi 2019.  Aruba hamas a spera loke e mester a enfrenta den e periodo aki.

Un confrontacion mundial a desaroya den porta di Aruba, cu mester a introduci medidanan pisa pa por sigui cana rumbo pa futuro.

Pasco Grandi ta inspira nos pa papia di futuro. Pa Cristiannan e ta e fiesta mas grandi di aña. Pa no Cristiannan, e renacemento di naturalesa despues di temporada frio, ta haya expresion.

Bida nobo, futuro, speransa, ta acompaña na un forma special e celebracion di Pasco Grandi despues di dianan di reflexion.

DIARIO tambe kier para keto un rato hunto cu henter comunidad, pa concentra riba e hende cu tabata mas cu nunca centro directo di tur loke a pasa.

E balor di hende ta central den e observacion di Pasco grandi. E hende, e comunidad, ta contempla e final di un caminda di bida pa despues confronta e luz di un dia nobo.

Den noticia sucesonan local y internacional a exigi nos presta atencion directo na e hende. E calidad di bida cu continuamente ta duna hende un aliento nobo y un deseo pa supera e crisis cu nos ta biba aden.

Balornan humano mester a duna nos e forsa pa mira e hendenan cu a yega na nos costa y na un cantidad di pais pa scapa di martirio di dictadura. Cara di hende destrui pa e lucha pa poder, di mucha cu hamber y sed, di enfermonan sin speransa di cura na un pais rico manera Venezuela.

E angustia di hende a apela na un forma special na nos sentimentonan humano. E tension grandi di Arubianonan, cu crisis y falta di e recursonan cu nan a spera cu lo a habri, a inspira nos pa mas cu nunca uza periodismo pa sali na vanguardia di hende y lucha pa den berdad nos por bandona e mundo di incertidumbre sofocante y sigui dilanti den un biento fresco.

Awe mundo liber ta uni den e causa di Venezuela y ta yuda e pais alcansa un mañan nobo.  Aruba tin un diseño pa un futuro den cual nos yiunan mester hereda loke nos ta laga atras.

Den e dolor di Venezuela, nos a mira kico ta pasa ora hende no keda isola den su dolor, pero hende yuda otro. E union di paisnan liber a inspira Venezuela pa sigui cana.

Awe laga nos tur inspira henter comunidad cu nos ehempel pa supera nos problemanan y hunto na un forma sincero crea un pais di felicidad pa e hende cu por mester di luz, di alegria, di oportunidad, di renacemento despues di dolor, di crisis, di e partinan dificil di bida.

Como matutino di Aruba, nos tambe ta hala atras un rato te caminda nos debernan permiti,  pa respira e bunitesa di Pasco Grandi.  Nos tambe lo tuma parti na tradicionnan di nos pais.

Un fin di Cuaresma cu ta reanima nos y un Pasco Grandi di bendicion y speransa nobo nos ta desea nos dushi pueblo di Aruba.

- Advertisement -

DUNA COMENTARIO

Please enter your comment!
Please enter your name here