Berdad nunca a perhudica ningun hende ningun causa ni ningun nacion. Cu e lema aki, na porta di Status Aparte y e futuro liber y democratico di Aruba, DIARIO a ser entrega na Aruba como defensa di bienestar di e pais.
Awe ta cu orguyo gerencia y personal ta confronta Aruba y ta duna testimonio di a keda fiel na e lema di fundado di DIARIO, Jossy Mansur.
E aña tras di lomba sigur no tabata facil. Na 2018 a bira evidente cu e proyecto Citgo cu a ser presenta como e solucion pa Aruba na 2016, no por a ser realisa manera a ser planea.
DIARIO a asumi e responsabilidad cu e confiansa di pueblo di Aruba den su informacion a exigi y a duna pueblo tur splicacion riba e proyecto, cu mas y mas a demostra di tabata un bofta pa den cara di Aruba.
Pasa a paso nos tabata presenta informacion tocante e acuerdo entre gobierno di Nicolas Maduro y Gobierno anterior di Aruba.
No tabata facil splica pueblo di Aruba cu e pais a bira victima di un engaño politico, cu a tranca economia di Aruba y ta un di e motibonan pa cual awe Aruba ta den crisis y parti di publicacionnan negativo rond mundo.
Awe no ta DIARIO ta papia di loke a pasa Aruba ora gobierno anterior a trapa riba democracia y contra ley a pasa e acuerdo di Citgo den Parlamento di Aruba. Cu prueba hasta di e interes Ruso den e compania, nos a habri wowo di Aruba.
Despues cu nos a laga diferente instancia mustra con a kibra ley y regla cu e acuerdo, con a bay contra interes di Aruba y e peliger grandi cu a hinca Aruba aden, Venezuela mes ta confirma loke DIARIO a presenta cu tabata e berdad y nada mas cu e berdad.
Gobierno anterior a pone Aruba baila pa un proyecto cu casi a destrui Aruba. E pais a scapa cu Aruba no a keda den man di Gobierno di Mike Eman, cu te na ultimo momento tabata gaña Aruba.
Tur instancia oficial y institucional na nos pais a haci nan trabou. Nan informacionnan a keda desconoci pa pueblo mescos cu e contracto cu a mira luz di publicidad ora un gobierno nobo a sinta y na 2018 a entrega e acuerdo na Parlamento di Aruba.
E bofta den cara di nos pais, ta haci dolor. Un pais honesto awe ta na discusion pa motibo di placa di Citgo, cu manera nos a trece dilanti na tanto ocasion y cu tanto prueba publica, tabata pasa pa gobierno di Nicolas Maduro.
Citgo tabata e baca di lechi cu a alimenta regimen Maduro y tabata un berguensa cu Aruba a firma un contracto cu e regimen.
Awe tur berdad ta riba mesa. Manera DIARIO for di momento cu Presidente Juan Guaidó a cambia gerencia di Citgo a trece dilanti, investigacion a cuminsa pa haya sa unda placa di Venezuela a bay.
Aruba su nomber ta den un luz negativo na mundo, cu a adverti Gobierno Mike Eman pa e contracto cu Citgo.
DIARIO ta exigi pa husticia ser haci cu Aruba y pa e caso aki wordo investiga dor di Reino. Hamas Aruba lo lubida e bofta cu el a ricibi ora su nomber ta ser poni hunto cu e gobierno di Venezuela cu mundo liber ta denuncia pa crimen sin igual.
Nos lo sigui e desaroyonan di acerca pa sigui informa Aruba, nos pais, cu semper a tene su cara na halto y hamas por a pensa cu e lo ta parti di un scandal mundial.
