Home Gobierno Gobierno mustrando cu pronto Aruba lo haya un Ombudsman

Gobierno mustrando cu pronto Aruba lo haya un Ombudsman

261
0
SHARE
— Aruba sperando di hopi tempo riba un Ombudsman.
- Advertisement -

ORANJESTAD (AAN): Diahuebs merdia, Prome Ministro Evelyn Wever-Croes a mustra cu Gobierno ta poniendo e ser humano central, y pesey pronto Aruba lo haya su Ombudsman pa brinda proteccion na cada ciudadano.

Desde cu Gabinete Wever-Croes a tuma over gobernacion, a pone e ser humano central y ta trahando pa wak cua ta e formanan pa duna miho proteccion na e ser humano. Aruba ta e unico pais den Reino cu no tin un Ombudsman. Un Ombudsman ta un defensor di pueblo. Caminda cu un ciudadano ta sinti cu e no a worde bon trata door di un departamento di Gobierno, e por acudi na un Ombudsman kende lo studia e caso y duna conseho na Gobierno con pa actua. Si e ciudadano ta sinti cu su derechonan no a worde cumpli cu nan, of ta worde trapa den e proceso di pidi permiso, tereno, restitucion di Impuesto, ta algun casonan valido cu un ciudadano por acudi na un Ombudsman.

— Premier Wever-Croes.

Cinco aña pasa, desde cu Prome Minister tabata den oposicion, el a cuminsa traha riba e tema aki cuestionando tambe cu e Gobierno di e tempo ey no tabata trahando riba e ley aki. Den notanan di Integridad cu Prome Minister e tempo ey cada aña a traha pa presenta na IPKO, el a haci varios proposicion cuanan lamentablemente no tabata tin oido pa nan. Y na fin di e periodo como Parlamentario, prome cu a drenta Gobierno, Parlamento hunto a traha un ley, na unda cu Prome Minister tabata un promotor tras di e ley aki pa bin cu e Ombudsman.

Manera cu e mandatario principal di nos pais a drenta Gobierno, el a pone prioridad na esaki y Gobierno a institui e comision ‘Commissie Versterking en Democratisch Bestel’. E comicion aki mester percura pa fortifica e base democratico na Aruba y nan tambe a trece proposicionnan riba e ley aki.

Pronto e ley di Ombudsman ta bay Parlamento. Ya caba tin fondonan den presupuesto pa e gastonan di e Oficina di Ombudsman. Tambe ya caba tin un persona apunta como e ‘kwartiermaker’ kende lo cuminsa organiza e oficina aki manera cu e ley pasa pa pronto Aruba haya su Ombudsman. Despues tambe lo habri solicitudnan di Ombudsman, Kinder-Ombudsman y demas funcionnan cu e oficina ta rekeri. Posicionnan aki lo worde yena primeramente door di hendenan cu ya ta trahando den Gobierno caba mirando cu tin un ‘personeelstop’ na vigor. Oficina di Ombudsman ta bay ta un instituto totalmente independiente di Gobierno pa garantisa miho servicio pa atende cu derechonan di ciudadanonan.

- Advertisement -

DUNA COMENTARIO

Please enter your comment!
Please enter your name here