Home Hudicial Hof a subi castigo pa tur cu a apela nan castigo pa...

Hof a subi castigo pa tur cu a apela nan castigo pa asalto arma na Gem Stones y La Estrella

922
0
SHARE
- Advertisement -

ORANJESTAD (AAN): Diamars mainta sentencia a cay pa e hombernan E.M.G., B.B. y A.F., kendenan a apela nan sentencia pa asalto arma. E.M.G. y A.F. a haci asalto arma na Gemstones dia 30 November 2016 y La Estrella dia 14 Januari 2017 mientras cu B.B. a participa den e asalto arma na La Estrella. Ta asina cu Hof a subi e castigo pa tur tres drastico.

A SUBI CASTIGO DRASTICO:

Via videoconference a conecta cu e prison na unda E.M.G. cu ta encarcela na Hulanda. E.M.G. ta worde considera un persona sumamente peligroso y door cu el a laga sa cu e lo huy for di KIA, el a worde manda Hulanda caminda e ta encarcela den un prison di seguridad halto.

E acusado A.F. a presenta den sala di Corte pero B.B. no a bin.

Hof a bisa aki ta trata di dos asalto arma y posecion di arma cu E.M.G. y A.F. ta complice mientras cu B.B. a participa den un asalto arma.

Hof ta haya cu nan tur tres ta complice di e asaltonan arma. Hof ta haya E.M.G. y A.F. culpable di e asaltonan arma na Gemstones y La Estrella, mientras cu B.B. ta solamente complice di e asalto arma na La Estrella.

Hof bisa cu lo duna castigo mas halto cu e sentencia di Corte den Promer Instancia. Ta asina cu E.M.G. den Promer Instancia a worde condena na 6 aña y 6 luna di prison, B.B. na 2 aña y 6 luna di prison y A.F. na 5 aña di prison. Hof ayera mainta a condena E.M.G. na 8 aña di prison, A.F. na 9 aña di prison y B.B. na 5 aña di prison.

Ta asina cu tin un daño perhuicio cu E.M.G. y A.F. mester paga na e empleadonan di Gemstones cu ta 6128 Florin y 50 mil Florin na Gemstones mes pa e prendanan cu nan a horta.

Hof a mustra cu nan ta haya cu E.M.G. hunto cu otronan riba un forma professional a haci asalto arma riba dos joyeria mientras B.B. un so. Den ambos caso a menaza empleadonan cu arma. A causa hopi spanto cerca empleadonan y experencia ta mustra cu nan lo por keda afecta pa tempo largo.

Hof ta haya cu loke e grupo aki a haci, a sacudi comunidad di Aruba y crea sentimento di miedo. A crea mal imagen di Aruba como un pais sigur y lo por afecta turismo pa e pais y asina perhudica economia di e pais.

Hof a bisa tambe cu a tene cuenta cu e declaracion di E.M.G. cu a duna claridad den e casonan di asalto arma y pesey el a haya 8 aña di prison mientras cu e complice A.F. a haya 9 aña di prison.

Aki claramente por mira con Hof di Corte di Husticia ta baha cu tur peso di ley riba esnan cu ta haci asalto arma. Den pasado Hof a yega di bati riba dede di Corte di Husticia cu ta duna castigo mucho abou. Cu e sentencianan aki, Hof ta bolbe manda un señal bon cla cu no ta tolera asalto arma.

- Advertisement -

DUNA COMENTARIO

Please enter your comment!
Please enter your name here