Home General Homenahe na Jossy Brokke

Homenahe na Jossy Brokke

436
0
SHARE
- Advertisement -

Den cuadro di dia mundial di buki y di derecho di autor

ORANJESTAD (AAN) – Awe, Diaranzon 24 di April 2019, di 7 or pa 9.30 or di anochi, lo tin un actividad na Biblioteca Nacional Oranjestad, dedica na celebracion di Dia Mundial di Buki y di Derecho di Autor.

E ta un dia simbolico pa celebra literatura na henter mundo. E anochi aki tambe lo bay tin un homenahe na Jossy Brokke, kende tin mas di 60 aña den farandula, kende lo bay dedica e anochi aki na Aruba y e lenga crioyo Papiamento.

Biblioteca Nacional Aruba y Departamento di Cultura Aruba, hunto cu Mirto Lacle, lo presenta un programa multidisciplinario cu enfoke riba e diferente disciplinanan di literatura, arte, cultura, linguistica y educacion en general. Lo enfoca riba e buki di Papiamento cu a keda reedita aña pasa pa Ralph Yarzagaray “El Papiamento, la Lengua Criolla…la gramatica mas sencilla”, skirbi pa dr. Rodolfo Lenz.

E anochi aki tambe e trilogia musica-canto-baile lo keda presenta en bibo. Lo demostra con palabra reihi na otro ta comberti den composicion poetico y ora agrega melodia na letra ta conduci na cantica/cancion y na coleccion di poema y cancion. Lo tin diferente presentacion, entre otro di Dj Caleto y su musica, presentacion di Frank Williams y Ronnie Kock, Jossy Brokke; y Grupo Melange, bao guia di Maybelline Arends-Croes, lo deleita cu nan cancionnan.  Musica y canto dedica na Padu del Caribe pa su di 99 cumpleaño. Lo recore e historia di “Bam canta”, “Nos ta canta” te “Reluci chispa musical”. 

UN TIKI HISTORIA DI JOSSY BROKKE

Jossy Brokke Jr. a actua na hopi pais na mundo hunto cu su amigo inseparable Camilo Alejandro Muyale. Jossy ta e prome Arubiano cu a representa Antiyas Hulandes na Festival di OTI 977 na Mexico. Entre otro el a actua tambe durante varios eleccionnan di reina, a actua cu Los Caciques na Tele Curacao na 1964, a toca hunto cu Etty Toppenberg cu Trio Huasteca na 1967 durante e festival di Antiyas den De Veer Theater.

Jossy a nace cu e don di canta y actua na diferente idioma y e mes ta composita su cancionnan.

Algun di Jossy su cancionnan ta icono manera entre otro: “Mi dushi Papiamento, Mi señora, Maria mi mama, Aruba amor patrio”, y e mas conoci cual el a rindi homenahe na su tera natal Aruba “Pais”.

Esaki ta un parti cortico di e historia di Sr. Jossy Brokke Jr.

Un invitacion cordial na autornan y publico en general pa asisti na e celebracion aki. Entrada ta gratis. E buki cu “Memorianan di Festival Voz-i-Landia Escolar” lo ta obtenible e anochi aki.

Pa mas informacion por tuma contacto cu sr. Mirto Lacle na 7402044.

“Books are at the intersection of some of the most essential Human freedoms of expression and freedom to publish. These are fragile freedoms”.

- Advertisement -

DUNA COMENTARIO

Please enter your comment!
Please enter your name here