Home Hudicial Hues a baha castigonan exigi pa Fiscal den caso asesinato ‘Ski’ den...

Hues a baha castigonan exigi pa Fiscal den caso asesinato ‘Ski’ den Rancho

322
0
SHARE
- Advertisement -

Hasta un sospechoso a wordo declara liber

ORANJESTAD (AAN) – Manera DIARIO a publica, ayera mainta Hues a dicta sentencia den e caso penal cu Ministerio Publico a cuminsa contra e grupo di 4 persona cu tabata den e auto for di cual a tira den Rancho ariba un grupo di persona y bala a alcanza Hubert Arrindell (Ski), kende despues di dos dia a fayece.

Ta asina cu Fiscal a exigi 18 aña di prison pa e muher Z.Q. y J.W. Ayera mainta Hues a declara J.W. liber y a baha e castigo di Z.Q. na 10 aña di prison. Pa J.B. cu Fiscal a exigi 4 aña di prison, Hues a conden’e na 4 aña di cual 1 aña ta condicional. E muher S.K. a wordo condena na 2 aña di un institucion hubenil. 

EXIGENCIA DI FISCAL

Luna pasa ora cu a trata e caso, Fiscal a bisa Hues cu e caso a cuminsa ora cu 18 Augustus 2018 tabatin un tiramento anochi den Rancho caminda Ski a wordo tira y a core bay riba su bicicleta. A haya 3 huls di bala na caminda e tiramento a sosode. Dia 20 Augustus 2018 na altura The Paddock, Sky a fayece riba caya.

Recherche a papia cu esnan cu tabata para ora cu auto a pasa los 3 tiro y core bay. Tres tabata para caminda e tiramento a sosode y otro dos na otro caminda ey banda. Nan a duna descripcion di auto y asina a bin detene esnan den e auto. Dia 24 Augustus 2018 a confisca e auto na cas di R.N. y a detene R.N. Despues e otronan a wordo deteni. Pompolonchi lo a tira riba auto di R.N. caminda e muher S.K., tabata sinta su so.

E tabatin relacion cu J.B. kende tin relacion cu gang di Sero Patrishi. S.K. a bisa nan di e tiramento y nan tur a bay den auto di R.N. pa Rancho. Z.Q. a haya e arma for di J.B. El a puntra dos biaha si mester tira y J.B., R.N. y S.K. a keda bis’e pa tira. Z.Q. a baha bentana y los tres tiro. A scucha hende grita y a core bay duro. Fiscal ta haya cu conhunto a traha un plan pa tira den Rancho cu a causa morto di Sky y tira tambe riba tres otro persona.

Fiscal a expresa cu no por permiti cu na Aruba tin un Wild Wild West. Esaki por ta fatal pa nos turismo. Fiscal kier a exigi mesun castigo pero J.B. y S.K. ta menor di edad y a pidi Hues pa ehecuta ley hubenil. El a mustra cu Reclasering y psicologo a conseha pa S.K. haya guia den un institucion sera pa asina drenta su comportacion.

Fiscal a pidi Hues pa impone ley pa obliga S.K. keda interna den institucion. J.B. ta asina Reclasering a recomenda institucion pero psicologo ta haya un tratamento pa regula emocion ta suficiente. Pesey Fiscal no ta bay exigi pa interna den un institucion. Fiscal a exigi pa J.B. 4 aña di prison.

Fiscal a exigi pa Z.Q. y J.W. cu ta complice di asesinato y intento mata tres persona, 18 aña di prison.

 

SOSPECHOSO DECLARA LIBER  

Ayera mainta Hues a bisa cu J.W. ta wordo acusa di ta complice di asesinato di Sky y complice di intento di asesinato di tres otro persona y tambe complice di posecion di arma di candela. Hues ta haya cu no por prueba cu J.W. ta complice.

Na opinion di Hues, e hecho cu J.W.  tabata presente den auto, y cu door cu S.K., a wordo tira promer a bay cu nan Rancho, no tin indicacion cu J.W. tabata sa di e plan di bay tira.

Ademas muher Z.Q. a bisa cu J.W. tabata sinta dilanti y no tabata envolvi den papiamento pa tira of no. Hues ta haya cu no tin coneccion cu ta mustra cu J.W. tabata envolvi. Hues a declara J.W. liber y a rechaza e peticion di Fiscal pa laga detene J.W.

NO POR PRUEBA PREMEDITA

Hues a bisa cu pa e otronan, Fiscal ta haya cu tin premeditacion di asesinato. Fiscal a menciona algun circumstancia cu segun Fiscal e grupo tabatin tempo pa pensa promer cu a tira. Door cu e muher S.K. a wordo tira promer, nan a subi auto y bay Rancho. Nan a pasa banda di e grupo di Rancho y bolbe y e ora ey a tira.

Hues ta haya cu tin circumstancia cu ta mustra cu por a pensa pero tin contra indicacion cu mester tene cuenta cun’e. Hues a mustra cu tur tres sospechoso a bay Rancho pa tira riba miembronan di gang. Nan tabata bebi y droga.

No por bisa cu nan tabatin intension di bay tira riba e hendenan. Ademas Z.Q. dos biaha a puntra si e mester tira. E otronan a stimul’e pa tira. Hues ta conclui cu aki no por prueba premedita. 

BAHA CASTIGO

Pa e sospechoso muher Z.Q., Hues a bisa cu Z.Q. a admiti di a tira. Pesey Hues ta hay’e culpable di complice di asesinato, intento di asesinato y posecion di arma di candela. Hues a bisa cu Z.Q. a kita e cos mas valioso di Ski, esta su bida. A causa daño irreparable pa e famia. A tira riba caminda publico y causa inseguridad. Hues a mustra cu abogado a pidi pa impone castigo hubenil.

Na opinion di Hues, a base di raportnan di psychiater y Reclasering no ta haya cu mester duna castigo hubenil. Pa cu e castigo, Hues a tene cuenta cu Z.Q. ta promer biaha cu e ta cay sera, cu e ta jong y a coopera cu investigacion y a lamenta loke el a haci. Hues a baha e exigencia di Fiscal di 18 aña. Hues a condena Z.Q. na 10 aña di prison. Por a mira cu Z.Q. tabata hari ora Hues a bisa e castigo.

Pa loke ta e muher S.K. y e homber J.B., Hues ta haya nan culpable di complice di asesinato y intento di asesinato y tambe posecion di arma. Hues a mustra cu for di declaracion di Q. y W. tabatin 3 persona den auto y Z.Q. a puntra si mester tira diferente biaha y nan a bisa pa tira diferente biaha. J.B. a pasa Z.Q. e arma y a instiga Z.Q. pa tira.

Hues ta haya cu esaki ta complice. El a musrta cu a tuma riesgo cu por a mata tur esnan cu tabata para. E causa di morto di Sky ta door di e tiramento. Tur dos tabata menor di edad y pesey ta aplica ley hubenil.

Hues a bisa cu a base di raport di psicologo y Reclasering e ta haya cu ademas di castigo hubenil por tuma medida pa interna S.K. den un instituto. Pa J.B. no tin esaki y pesey no por ordena interna den instituto. Pesey Hues ta condena J.B. na un castigo combina mirando su edad y pa e bay bou guia di Reclasering y evita cu lo ripiti. Hues a condena J.B. na 4 aña di prison di cual 1 aña ta condicional y bao guia di Reclasering.

Pa loke ta S.K. expertonan ta conseha cu e mester bay den un instituto pa drecha su comportacion. Hues ta tuma over e consehonan y pa interes di seguridad di comunidad y ta ordena pa S.K. bay obligatorio interna den un institucion pa 2 aña.

- Advertisement -

DUNA COMENTARIO

Please enter your comment!
Please enter your name here