Home Hudicial Hues a declara liber e Hulandes cu a haci menaza di bom...

Hues a declara liber e Hulandes cu a haci menaza di bom na aeropuerto

1373
0
SHARE
— Na opinion di Fiscal, esaki no ta un delito serio.
- Advertisement -

ORANJESTAD (AAN): Diahuebs mainta Corte den Promer Instancia a trata e caso penal cu Ministerio Publico a cuminsa contra e homber Hulandes U.G., kende na Januari 2019 a causa drama na aeropuerto ora cu el a bisa cu e lo tin un bom cun’e.

Pa straño cu e por ta, ta asina cu ni Fiscal ni Hues no ta haya U.G. culpable di menaza falso. Aunke cu Fiscal den su acusacion ta acusa U.G. di a menaza e guardianan di aeropuerto y tambe pasaheronan, toch e no ta haya U.G. culpable y a pidi Hues declara U.G. liber, cual Hues a haci tambe.

    MENAZA DI BOM:

Dia 6 Januari 2019, accion a tuma lugar na aeropuerto ora cu algun guardanan di aeropuerto y pasaheronan a scucha e homber U.G. bisa cu e lo tin un coy tira na su pia y na su barica e lo tin un bom.

U.G. a viaha di Hulanda pa Aruba pa despues sigui pa Bonaire. Despues di henter e procedura di seguridad na aeropuerto pa un caso di menaza di bom, a resulta cu U.G. a gaña pasobra e tabata rabia cu e mester a pasa door di control di seguridad di aeropuerto.

Durante tratamento di e caso, Fiscal ta mustra un rato riba e seriedad di un menaza di bom na aeropuerto pero despues ta bisa cu e por compronde cu door cu U.G. tabata hopi disgusta cu na Aruba, apesar cu e tabata di transito, mester a baha for di avion y mester pasa den tur e proceso di control. U.G. a bisa cu na Schiphol ya caba el a worde controla. Ta pesey el a expresa cu e lo tin un arma y un bom.

— Bom Melding na otro paisnan.

Guardia di aeropuerto di Aruba a mustra U.G. cu tin maneho di seguridad cu mester sigui y cu U.G. mester cumpli. U.G. tabata blo zundra y na dado momento el a bisa cu e lo tabatin un coy tira na su pia y un bom na su barica.

Ta logico cu expresionnan asina den cualkier aeropuerto lo causa panico. Loke pa DIARIO a keda hopi straño ta e hecho cu di parti di Fiscal no a tuma e asunto aki debidamente na serio. Si tabata na Merca, e Hulandes U.G. a hay’e den problema hopi serio.

Na Aruba, el a worde deteni y despues di 10 dia el a worde laga liber y el a bay back Hulanda.

   FISCAL:

Fiscal a bisa Hues cu e ta haya cu e guardianan no tabata haci caso di e menaza y a actua trankil. Nan a haci keho di e comportacion di U.G.

Fiscal a sigui bisa cu e pregunta ta si esaki ta un delito serio. Na opinion di Fiscal, esaki no ta un delito serio y a pidi Hues pa declara U.G. liber.

   DEFENSA:

Abogado mr. Thielman ta haya cu no tabatin motibo pa a detene U.G. pa menaza. E guardianan tabata sa cu no ta menaza. Nan a haci denuncia pa e molestioso cu U.G. tabata.

E abogado a remarca y hasta a mustra copia di corant, cu door di e caso aki, a daña reputacion di U.G. Awor e tin hasta sobre nomber UBom. E abogado a bisa cu U.G. a siña su les. E abogado ta comparti punto di bista di Fiscal.

   SOSPECHOSO DECLARA LIBER:

Hues a sera tratamento di e caso y a dicta sentencia di biaha. Hues ta haya cu den forma di un discusion U.G. a reclama pakico e mester bolbe worde controla si na Schiphol a haci’e caba. E ora ey el a expresa cu e lo tin un arma cun’e na su pia y un bom na su bariga. Hues a bisa cu expresionnan asina normal ta hopi serio pero den e caso aki e ta comparti punto di bista di Fiscal y ta declara U.G. liber.

Na opinion di DIARIO, ta parce cu ta door cu ta un Hulandes Europeo, no ta tumando e caso aki na serio? DIARIO ta puntra si Ministerio Publico a reacciona den e mesun forma si ta un persona di un otro nacionalidad, por ehempel un Arabir, cu a rabia cu e mester worde controla?

Ta remarcabel tambe cu Ministerio Publico no a scoge pa a acusa U.G. di a causa Discordia den un lugar publico. DIARIO por a compronde cu Ley penal di Aruba conoce articulonan cu ta castiga un persona pa e servicio na un aeropuerto y causa Discordia. Sinembargo U.G. no a worde acusa di a viola e articulo aki, tanten cu tin motibo pa a acus’e di esaki tambe.

Mescos cu ta haci cu casonan di atraco, droga, traficacion di hende, mester a manda un señal bon cla cu na nos aeropuerto no ta tolera hende bin haci tipo di menaza asina.

- Advertisement -

DUNA COMENTARIO

Please enter your comment!
Please enter your name here