Home Gobierno IMF tin confianza den e recuperacion lento pero sigur di  Aruba su...

IMF tin confianza den e recuperacion lento pero sigur di  Aruba su economia

111
0
SHARE
- Advertisement -

Segun conclusion di evaluacion:

ORANJESTAD (AAN) – Dialuna mainta, Conseho di Minister completo tabata presente den conferencia di prensa, unda Minister Presidente mr. Evelyn Wever-Croes a elabora tocante e rapport tocante e evaluacion cu Fondo Monetario Internacional, a realiza durante e ultimo dos siman, cual ta uno positivo pa nos Isla.

Minister Presidente a splica cu cada dos aña IMF ta haci un evaluacion tocante e situacion economico y financiero di nos pais, cu nan ta yama un “Article Four Mission” (Mision di articulo 4).

Durante e ultimo dos simannan IMF a hiba combersacionnan cu varios sector publico y priva y tambe cu gobierno y oposicion.

Dialuna mes IMF a publica su “concluding mission statement” cual ta hopi positivo pa Aruba. Minister Presidente a señala cu si compara e mesun conclusion aki cu esun di dos aña pasa, na 2017, cu nan a expresa: “Growth is weak” (crecemento ta zwak). Aworaki na 2019 nan ta expresa: “Outlook is broadly positive” (e proyeccionnan ta ampliamente positivo).

“Pa 2019 nan ta premira un crecemento economico real di 0.7% cu ta ekivalente na 2.4% crecemento nominal”, e mandatario a señala y a agrega cu e ta haci enfasis den e 2.4% aki, pasobra den e presupuesto di 2019 nan a tene cuenta cu un crecemento di 1% nominal.

Pues, cu esaki IMF ta mustra su confianza cu e economia lo crece mas di locual nos tabata tin den nos presupuesto y esaki ta duna gobierno un espacio pa hala rosea.

E mandatario a splica tambe cu esaki ta loke nan ta yama tambe un “base line”. E 2.4% aki ta sin tene cuenta cu otro esfuerzonan cu gobierno di Aruba a haci, entre otro e vision economico di seis sector cu Minister di Economia ta trahando riba dje.

E mandatario a agrega cu pa añanan despues di 2019, por ehemplo 2020, IMF ta premira un crecemento economico real di 1.1% cu ta ekivalente na 3% nominal y eynan tambe ta mas halto di loke gobierno a tene cuenta cune, y pa 2021 nan ta premira un crecemento di 3.1%. “Cu esaki pues, IMF ta conclui cu nan tin confianza den nos economia cu ta recuperando poco, poco pero sigur”, Prome Minister a expresa.

 

- Advertisement -

DUNA COMENTARIO

Please enter your comment!
Please enter your name here