Home Policial Liliana Rasmijn di KPA: “Ban ta conciente y cuida nos beachnan”

Liliana Rasmijn di KPA: “Ban ta conciente y cuida nos beachnan”

185
0
SHARE
- Advertisement -

ORANJESTAD(AAN): Awor cu temporada di campamento ta dilanti di porta, AHATA, Cuerpo Policial y un grupo di studiante boluntario ta bay participa den un campaña pa cuida nos medio ambiente.

Durante un conferencia di prensa Diaranzon, Liliana Rasmijn vocero suplente di Cuerpo Policial di Aruba a trece dilanti cu despues cu AHATA a acerca KPA pa colabora cu e campaña di 2019, cu placer nan a acepta pa participa un biaha mas.

Segun Rasmijn, riba un bunita brochure cu AHATA a saca, bo por wak diferente punto cu KPA a bin cune, pa hendenan cu ta campa tene cuenta cune.

El a splica cu ora cu un persona bay busca su permiso pa campa, e lo haya mas punto tambe pa tene cuenta cune.

“AHATA a enfoca riba e beachnan y nos ta pidi tur hende pa tene cuenta cu e neishinan di turtuga, pa no core riba e santo blanco cu ningun tipo di vehiculo di motor, ni bicicleta, ni cabay, ni garoshi”.

“Esey ta cosnan cu semper tin poni den e puntonan di permiso”.

“Un di e puntonan mas importante cu ta conta pa tur dia, ta cu no ta permiti pa hasi barbecue riba santo blanco”.

“Si bo kier hasie mes, mester hasie mas leu posibel di e santo blanco y quizas pone pida palo bao di dje, manera cu hopi hende sa hasi caba”.

Esaki segun Rasmijn, kende a sigui bisa cu preferiblemente si bo barbecue pa uza gas y no carbon.

El a hasi un apelacion tambe di parti di KPA, pa esnan cu tin permiso pa nan tin esaki visible.

“Nos por controla mainta, atardi of anochi, pues mantene e permiso visible y no den auto por ehempel, unda cu tin hende ta bin cu e escusa cu e permiso ta den e auto y un hende a bay cu e auto bin bek”, segun Rasmijn.

El a sigui bisa cu ta bon pa evita cu boternan cay den e santo blanco.

Un boter cu kibra por causa daño na abo of otronan cu ta hasi uso di e beach, segun e vocero policial suplente.

“No tira nada den laman tampoco”.

“Nos ta bay controla y nos por duna multa pa esaki”.

“Corda cu si bo no sigui e puntonan cu bo a haya den bo permiso pa campa, nos como cuerpo policial por kita esaki cada momento”.

“Pues ban ta conciente y cuida nos beachnan”, segun Rasmiijn.

- Advertisement -

DUNA COMENTARIO

Please enter your comment!
Please enter your name here