Home Hudicial Miembro di seguridad di CEA sospecha di a abusa di su yiu...

Miembro di seguridad di CEA sospecha di a abusa di su yiu y un otro mucha declara liber

361
0
SHARE
- Advertisement -

Mientras cu Fiscal a exigi 4 aña di prison

ORANJESTAD (AAN) – Diahuebs merdia Hues di Corte den Promer Instancia, contrario na Fiscal, no ta haya legal y convicente proba cu e sospechoso F. ta culpable di e acusacionnan di abuso di su mesun yiu muher y un otro mucha muher. Fiscal a exigi 4 aña di prison y ayera merdia Hues a bisa cu e ta declara F. liber y a duna orden pa pone den libertad di inmediato.

ACUSACIONNAN

Luna pasa tratamento di e caso a tuma lugar caminda e acusacionnan cu Fiscal a presenta den Corte contra F. ta:

–          Den  e periodo di 16 di Mei 2011 te 15 Mei 2013, e lo a abusa di un mucha cu ainda no tabatin 12 aña.

–          Den e periodo di 26 di Mei 2010 te 25 April 2015, e lo a abusa di un mucha cu ainda no tabatin 16 aña.

E acusacionnan di Fiscal ta mustra cu durante algun aña, e sospechoso F. tabata abusa di muchanan menor di edad, kendenan pa colmo ta su mesun yiu muher y su sobrina.

SOSPECHOSO DESMENTI

  1. a desmenti esaki totalmente den Corte. El a bisa Hues cu Voogdijraad a prohibi’e pa bay serca su yiunan. Segun F. dos biaha el a busca e yiu muher na parada di bus y a hib’e cas pa come hunto cu F. su partner y despues a hib’e bek na su wela. Hues a puntra si el a hiba e mucha den camber manera e mucha ta bisa. El a bisa Hues cu e mucha a keda den sala, come y a hib’e bek na su wela. El a desmenti cu el a busca e yiu muher y su yiu homber. Segun F. awor na grandi e tin contacto cu su yiu homber.

COMPLOT DI MAMA

Segun F. esaki ta un complot di e mama y e no ta culpa su yiu muher. Hues a mustra cu den e caso aki ta e juffrouw di school a bin saca afor, papiando cu e mucha, cu su tata a mishi cun’e. Hues a mustra cu e mucha tabatin berguensa y no tabata kier pa conta su mama of famia. A logra convence e mucha pa bisa e mama y esey a sosode na school.

EXIGENCIA DI FISCAL

Fiscal a bisa cu F. ta desmenti tur cos. Pero tin suficiente prueba. Tin denuncianan haci y mirando declaracion di e victimanan, Fiscal ta haya cu tin suficiente prueba. Fiscal a bisa cu aki no ta trata di un complot pa regla cuenta cu F. sino cu algo realmente a pasa. E hendenan rond di e victimanan a mira cu e victimanan a cambia den comportacion y cu nan ta wanta algo. Tambe Fiscal a mustra e acercamiento di F. cu e mucha muher di 14 aña. Fiscal a sigui bisa cu F. ta haya cu su forma di papia tabata masha normal. El a bisa cu e tabatin relacion cu un Venezolano hopi tempo y e expresion di dushi ta algo masha normal. Na opinion di Fiscal, tin suficiente prueba cu F. a mishi cu e dos muchanan. Fiscal a bisa cu no por prueba cu realmente F. a mishi cu pecho di su mesun yiu muher y a pidi Hues pa declara F. liber pa esey.

Pa cu e castigo Fiscal a bisa cu e ta tene cuenta con muchanan a keda afecta. El a tene cuenta cu F., como miembro di CEA, ta sera den KIA. Door cu ta trata di muchanan menor di edad, Fiscal ta considera esaki mescos cu violacion. Esaki a sosode diferente biaha y a tacha integridad di e muchanan. Fiscal a tuma F. na malo cu a hacie cu su propio yiu muher y su sobrina. Fiscal a exigi 48 luna di prison, kitando e tempo cu e ta sera den KIA.

SENTENCIA

Diahuebs merdia Hues a dicta sentencia y Hues ta haya cu contrario na Fiscal, e no ta haya legalmente y convicente proba cu F. a abusa di e muchanan. Hues a bisa cu for di e investigacion por mira cu tur e declaracionnan ta bin di e mesun fuente o sea e dos muchanan. A base di ley mester tin prueba di sosten y Hues ta haya cu esey no ta e caso. Hues a declara F. liber y a duna orden pa e wordo poni den libertad e mesun dia.

 

- Advertisement -

DUNA COMENTARIO

Please enter your comment!
Please enter your name here