ORANJESTAD (AAN) – Minister di Enseñanza sr. Rudy Lampe, a duna di conoce, den conferencia di prensa, cu el a ricibi e yabi di scol SPO (Scol practico pa Ofishi) na Brasil.
E dignatario a sugeri prensa pa bishita e scol aki, cu ta den un bunita edificio y a splica cu e ta un proyecto cu a cuminza bao di e gobierno anterior, y Gabinete actual a continua cune pasobra nan no ta wak interes di partido ni color politico, sino cu loke ta bon pa Aruba nan ta apoya.
Minister Lampe a reitera cu e siman aki el a ricibi e yabi di e edificio grandi aki, unda cu expertonan di DOW ta satisfecho cu e periodo cu a wordo entrega sin retraso, y tambe pasobra e calidad di e edificio y e facilidadnan cu ta bay tin, ta pa e muchanan special pasobra e ta un scol pa muchanan MLK (moeilijk lerende kinderen). E mandatario a acentua cu Gabinete Wever-Croes ta un gobierno di inclusion.
E dignatario a subraya cu gobierno tin atencion special pa muchanan special, y aworaki a crea un excelente facilidad pa e hobennan aki, y asina demostra cu gobierno kier pa tur hoben na Aruba por progresa.
