Home Gobierno Minister Otmar Oduber mes ta pidi screening pa tur inversionista sin excepcion

Minister Otmar Oduber mes ta pidi screening pa tur inversionista sin excepcion

358
0
SHARE
- Advertisement -

 “Gobierno ta percura pa transparencia y integridad”

ORANJESTAD (AAN) – Minister Otmar Oduber, como titular di Infrastructura, a referi na e carta di caracter interno di Banco Central, pero cu a bira publico y a pone Gobierno saca un comunicado ya cu, a base di e carta aki, a surgi hopi pregunta den pueblo.

Den e carta Banco Central ta alerta e banconan comercial tocante e grupo di inversionista cu kier desaroya un hotel na Baby Beach.

E dignatario a subraya cu Banco Central tin un rol cu e tin cu cumpli cune, di haci screening na momento cu un inversionista kier haci un inversion unda tin sumanan grandi envolvi y cu mester di licencia pa importa placa cu ta wordo financia for di afo.

E mandatario a subraya cu ta masha normal cu esaki ta bay via Banco Central, y den e caso aki gobierno ta pone su rekisitonan.

Minister Otmar Oduber ta haya hopi straño cu e carta a sali den publicidad, pero gobierno ta respeta e autoridad cu Banco Central tin.

Riba su mes e ta un carta cu BC a emiti a base di un articulo cu a sali den un corant, y esey e carta ta bisa tambe, y a base di declaracionnan cu tabata tin Diamars, Parlamentario Dowers a duna e carta un interpretacion adicional, comosifuera tin algo robes den loke ta pasando aworaki.

Minister Otmar Oduber a señala cu contrario na loke a tuma lugar den pasado, ta wordo pretendi di ta manera cu sr. Dowers ta bisa, na e momentonan aki mescos cu tur otro proyecto tin screening ta tuma lugar riba esnan cu ta envolvi den cualkier proyecto, no solamente esun di e hotel, unda ta rekeri di inversionnan grandi.

Gobierno ta warda riba e resultadonan di esaki, mescos e compania cu mester haya e vergunning pa por importa placa na Aruba. Gobierno na su turno a prepara tur e documentacion necesario y a pone tur e rekisitonan sin excepcion pa e grupo aki, mescos cu pa tur otro grupo.

Minister Oduber a subraya cu e hilaridad cu tin ta cu awe tin un gobierno cu ta percura pa screen tur esnan cu kier inverti y forma parti di Aruba su economia, y e ta haya hopi straño cu sr. Dowers y net e como ex-minister di husticia, ta esun cu ta cuestiona awe, cu gobierno mes ta tuma iniciativa di screen esnan cu ta bin inverti na Aruba y cu ta bin cu fondonan internacional pa hinca den nos economia.

Riba su mes, e ta kere cu ta un proceso cu ta bon cu ta tuma lugar na e momentonan aki. E mandatario a indica cu su mes persona a dirigi un carta den e caso aki pa Departamento di Seguridad di Aruba mes, mirando cu e rol di Banco Central ta limita, pa por haci e screening y ta sigur cu no ta sosode loke a pasa bao di nanishi di ex-minister di Husticia sr. Dowers.

Esey ta e diferencia, e mandatario a acentua. E gobierno aki ta percura pa tin transparencia y integridad, e mes y no otro hende a dirigi un carta pa screening tuma lugar prome cu keda cla. E grupo practicamente a cumpli cu tur exigencianan di DIP y aworaki ta wardando unicamente, riba e resultado di e screening cu mester tuma lugar y gobierno ta haci esaki na un manera responsable.

 

 

- Advertisement -

DUNA COMENTARIO

Please enter your comment!
Please enter your name here