Analisis
E compromiso pa Rey y politiconan goberna segun Ley
Liderazgo ta parti di naturalesa y asina tambe di e forma cu sernan humano ta biba cu otro.
Famia, organisacion, pais mester di un lider cu e ultimo palabra den discusionnan y na bienestar di tur hende. Nacionnan mester di un hefe di estado y un sistema pa hende manda riba hende.
Liderazgo mara na herencia a produci finalmente emperador y rey. E filosofia di democracia ta opone liderazgo pa herencia y ta basa su mes riba e hecho cu pueblo tin gobernacion den su man.
Con dificil esaki ta, sigur ta ser ilustra den historia di Francia, caminda Napoleon Bonaparte a lanta contra e sistema real y hasta a introduci palabranan cu a wordo uza como base pa e sistema democratico social: libertad, igualdad y fraternidad.
Pero tabata Napoleon cu a somete henter Europa y a declara su mes emperador di Francia.
Pa Napoleon por a haci furor como rebelde na Francia, mester tene cuenta cu e forma cu monarkia Frances na forma extremo, a maluza su poder.
Monarkia y democracia ta realmente oponente pero e dos sistemanan estatal a uni den monarkia constitucional den cual e Rey of Emperador (e soberano pa herencia) mester tene su mes na reglanan constitucional den cual democracia ta hancra.
Aruba conoce un Monarkia Constitucional, cu ta e alma di Statuut cu ta regla e relacionnan den Reino, cu te awe conoce problema aunke tin un cuadro legal pa soluciona nan.
Un areglo ta bira ley ora tanto e mundo politico como Rey of su representante cu ta Gobernador, firma e ley.
Rey ta e Hefe di Estado, cu ta determina nacion, ciudadano y e bienestar di e nacion y e ciudadano. Den e Statuut, Reino ta keda encarga cu e bienestar di e ciudadano cu mester conta cu un bon gobernacion di politiconan cu e eligi por ehempel. Defensa di e integridad y siguridad personal y nacional ta den man di Reino.
Den e sistema cu Aruba conoce pues, e Monarkia Constitucional, ni Rey ni politiconan por pone Constitucion, cu ta e leynan basico di e pais un banda, pa nan mes dicidi.
Por papia pues di un siguridad di dos banda pa sostene democracia na e pais.
Hopi bes mundo politico den un Monarkia Constitucional, no ta di acuerdo cu e sistema cu ta regla e pais como estado di derecho. Politiconan tin e tendencia di sinti nan poder menasa pa e hecho cu Reino (e refleho di Rey) por limita nan paso.
Pero di mes manera cu Rey no tin poder absoluto, politiconan tampoco tin poder absoluto.
Den historia Napoleon Bonaparte ta un ehempel kico por pasa cu politica sin control superior. Awe Venezuela ta duna un bista cla con un pais ta cay den un par di decada den un dictadura ora politica no pone limite.
Con hende mester manda riba hende? Comunidad Europeo, Organisacion di Estadonan Americano ta dos ehempel con a base boluntario paisnan ta crea dobel candal contra dictadura.
Statuut ta reconoci como un di e miho documentonan estatal pa proteha ciudadanonan. Pasobra historia a proba, cu ora hende manda riba hende, por bini problema.
