Home Policial Musica di Dongo a pone chauffeur core rond Savaneta ta mik arma...

Musica di Dongo a pone chauffeur core rond Savaneta ta mik arma riba automobilistanan

19459
1
SHARE
— Cantante Curasoleño Dongo. (Potret cortesia YouTube)
- Advertisement -

ORANJESTAD (AAN): Un caso hopi serio, y tambe tiki espantoso cu a pone chauffeurnan den panico, a socede Diamars mainta riba highway di Oranjestad pa San Nicolas, den area di Savaneta.

E prome yamada a drenta banda di 8:15 am, ora cu hendenan a cuminza notifica autoridad cu tin un auto ta coriendo na forma di spanto, ta pasando autonan pa loco, y e hendenan sinta aden ta saca un arma y menaza demas automobilistanan.

Comandante di Warda di Polis na San Nicolas tambe a ricibi e notificacion aki.  El a haya informacion acerca, cu ta un vehiculo color marron Kia Rio tabata core masha roekeloos mes riba caminda, y hendenan ta mik un arma riba demas chauffeurnan.

E informe a mustra despues, cu e chauffeur di e Kia Rio aki lo ta rek su man pafo y lo ta usando un arma di candela pa spanta otro chauffeurnan door di mik esaki riba nan.

Polis a haya infomacion cu e auto aki tabata coriendo den caminda patras di Savaneta, den direccion di Zeerovers bay pariba.

E unidad di Polis di San Nicolas a cuminza move den area strategico pa vigila trafico, y enberdad banda di Kinppo Foodcenter na Cura Cabay nan a pone nan luz y sirena y obliga e auto pa stop.

Ora cu e chauffeur di e Kia Rio a ripara esaki, e lo a spanta asina hopi, y mescos cu un mucha chikito den panico, el a zwaai y benta e arma afo.  Polis a mira esaki claramente.

Polis a bay check, y a resulta cu e arma ta uno falso, mas bien un co’i hunga.  Asina a yega cerca y papia cu e chauffeur di inicial N.

Aki el a bin cu un storia na Polisnan, cu nan tabata coriendo ta blaas musica rap di e cantante Dongo di Curaçao.  El a splica cu e letra y ritmo di e cancionnan di Dongo, a pone cu nan a cuminza haci wega cu e pistola di co’i hunga riba otro chauffeurnan, pero cu nan no kier a haci esey un problema.

Pero pa Polis, esaki sigur ta un caso serio!  Nan a detene tanto e chauffeur di inicial N., y e dos ocupantenan di inicial E. como tambe inicial D.

Nan a wordo hiba na Warda di Polis na San Nicolas, unda nan a ser presenta dilanti e Comandante di Warda.  Esaki na su turno a papia masha fuerte cu e personanan aki, y a duna nan un scual cu loke nan a caba di haci riba caya, ta core roekeloos y sembra panico cerca ciudadanonan.  Tur esaki pa musica di Dongo….

Polis no a suministra prensa cu informacion, ta cual di e cancionnan di Dongo nan tabata scuchando den auto e mainta trempan ey.

- Advertisement -

1 COMMENT

  1. Echt koi Kens, pa bisa ku ta pa falta di muziek i mas ahinda pone esaki riba facebook. Dus si mi tende un rap ku ta bisa bai atraka un banko, mi ta bai i tira falta riba e muziek? Kom op mensen nos tur saki ta bon of malu i nos tur ta responsabel pa nos akto nan

DUNA COMENTARIO

Please enter your comment!
Please enter your name here