ORANJESTAD(AAN): Diamars a tuma lugar un conferencia di prensa na cas di Pastoor Canuto (Toti) Fuentebella, Pastoor di Parokia di Santa Filomena, Paradera.
E conferencia di prensa a wordo yama pa e Comision di Hubileo 70 Aniversario di Parokia Santa Filomena.
Durante e conferencia di prensa a duna informacion riba e preparacionnan cu Parokia tin planea pa celebra e Hubileo di 70 Aniversario di e Parokia.
Pastoor Toti a splica cu tabata den aña 1948 riba 19 di September cu Pro-Vicaris Pastoor Spekle a bendiciona e prome piedra, kende tambe a bira e prome Pastoor di Parokia di Paradera.
Dia 2 te cu 11 di Augustus 1949 a tene e prome nobena na honor di Santa Filomena, patrono di parokia.
Riba 8 di September 1949 tabata e dia grandi den historia di nos Parokia. Riba e dia aki, fiesta di Nacemento di Birgen Maria, e misa nobo dedica na Santa Filomena, a keda bendiciona solemnemente pa Mgr Zeppenfeldt, Obispo Titular di Vicariato Apostolico di Corsou,awe Bisdom di Willemstad.
“Mirando e ocasion aki, a keda dicidi pa celebra e hubileo cu diferente programa cu ta duna oportunidad pa e comunidad parokial celebra hunto cu e pueblo parokial y viceversa”
“A scohe pa habri e periodo di e celebracion di 70 Aniversario durante e SS Misa Solemne di Pasco di Resureccion, esta durante e Misa di mainta di Diadomingo cu a caba di pasa”.
“Manera for di e prome aña di existencia di nos Parokia, e aña aki tambe for di 2 di Augustus te cu 10 di Augustus, nos lo tin nos novena na Honor di nos Patrona, Birgen y Martir Santa Filomena”.
Esaki según Pastoor Toti, kende a sigui bisa cu e fiesta di 11 di Augustus ta un Celebracion di SS di Misa solemne na honor di Santa Filomena oficia pa Mgr Luis Antonio, Obispo di e Diocesis.
E dia grandi di celebracion e aña aki ta 8 di September, Fiesta di nacemento di Maria, fecha di 70 aniversario di apertura di e misa consagra na Santa Filomena.
“Prome cu SS di Misa lo tin un procesion rond di seroe di Paradera cu participacion di e pueblo di Paradera, sigui pa un SS di Misa Solemne oficia pa mgr Gregorio (Greg) Redoblado, Vicario General di nos Diocesis”.
“E celebracionnan aki lo wordo acompaña durante e periodo di celebracion cu otro programanan manera hubileo pa famia, pa cooperadornan, pa muchanan di scol, pa hobennan, pa nos grandi y enfermonan y esnan den necesidad cu tambe ta parti di e Plan Pastoral”. “Tambe e construccion di e Cas Parokial, cu algun siman pasa a duna inicio na su construccion. Recientemente a termina e prome fase, cu ta e fundering te cu e vloer. Riba plan nos tin cu dia 17 di november proximo,cu poder di Dios, nos lo laga Mgr Luis Antonio, bendiciona e edificio nobo aki”.
“Esaki ta e programanan den liñanan grandi di nos celebracion di 70 aniversario”, según Pastoor Toti, kende a indica cu un di e metanan di e programa ta, pa promove participacion activo di tur fiel den e parokia na e programanan pastoral den espirito di cooperacion mutuo.
“Tambe duna oportunidad pa crece den conocemento di Cristo y su mensahe pa medio di acercamento di e pueblo di Dios pa logra como resultado un cambio di curason”.
“Pa e ocasion di nos celebracion di hubileo nos a introduci un oracion, cu nos ta resa na final di nos SS di Misa y na tur actividad di 70 aniversario”
“Tambe nos tin nos logo y slogan pa e celebracion di 70 aniversario”.
“Encuentro cu Cristo, encuentro cu otro, ta nifica cu pa medio di Cristo nos ta encontra nos tambe cu otro, kiermen door di participa activamente na e programa y actividadnan di nos Hubileo di 70 Aniversario”.
“Mi ta haci un yamada na tur parokianonan di Paradera pa sea parti di e celebracion; sea cu bo ta miembro di un comision, voluntario of como participante na e programanan”.
“Tambe un peticion ta bay na e comunidad comercial pa duna nan participacion na e celebracion aki, si e comision organisado acerca bo negoshi. Nos tin un comision organisado forma pa Cooperadornan di Parokia cu lo dirigi tur e actividadnan aki for di un Plan di Accion na un manera organisa, responsabel y transparente”
“ Un comision organisado di miembronan cu capacidad, bastante anima y curashi cu ta dispuesto pa logra e metanan menciona”.
“ Finalmente mi ta invita y encurasha tur Parokiano di Parokia di Santa Filomena y e pueblo di Aruba en particular pa participa na e celebracionnan y e programanan di e hubileo di 70 aniversario. Mas despues lo sigui mas informacion concreto di e programanan aki”, según e pastoor.
