Peticion pa investigacion di negociacion, introduccion y resultado acuerdo cu Citgo

    637
    0
    SHARE
    - Advertisement -

    Carta abierta na Algemene Rekenkamer Aruba

    Honorabel miembronan di e colegio Algemene Rekenkamer Aruba,

    Pa medio di esaki, DIARIO como matutino cu a wordo introduci pa pueblo por participa activamente den e buskeda di bienestar nacional di e pais Aruba, ta acerca bo colegio cu e peticion pa duna inicio na un investigacion di e negociacion, introduccion y resultado di e acuerdo cu a conduci na introduccion di e proyecto conoci como rehabilitacion refineria Aruba.

    Nos ta duna reconocimento na bo organo como Colegio Halto di Estado, cu ta encarga cu supervision di gastonan cu ta ser haci cu fondonan di pueblo cu mester transcuri a base di leynan y reglanan di e sistema legal di nos pais.

    Nos ta reconoce den Algemene Rekenkamer Aruba, e instrumento constitucional di ciudadanonan pa garantisa cu tur accion financiero di e pais, ta honra nos base constitucional legal y di efectividad y integridad.

    Como colegio independiente, bo ta representa e poder cu democracia ta duna pueblo pa garantisa e bienestar di e pais y cada ciudadano, cu no por ser mara dor di su representantenan den gobernacion na actonan y decisionnan cu ta bay contra interes di e pais y asina di pueblo.

    A keda demostra cu e acuerdonan cu a ser firma na 2016 entre gobierno di Aruba den cuadro di e proyecto rehabilitacion refineria, no ta coresponde na e normanan legal ni di efectividad y integridad hancra den nos leynan.

    Den esaki nos ta referi directamente na rapportnan oficial di conseho institucional manera di Raad van Advies, cu cuestiona e caracter legal di acuerdonan cu gobierno a firma como representante oficial di Aruba sin e mandato di Parlamento, cu no a haya e oportunidad hancra den nos leynan pa duna gobierno di Aruba, mandato pa bay negocia e acuerdo y hasta mara Aruba na acuerdonan di gran importancia pa nos situacion economico y financiero.

    Gobierno cu firmamento di e acuerdonan a deshaci di nos leynan y cu un caracter secreto cu nos leynan no ta permiti, a mara Aruba sin mandato di Parlamento di e pais na:

    1. Un proyecto pa rehabilita refineria cu por ser considera un proyecto di halto riesgo pasobra anteriormente tres compania petrolero reconoci internacionalmente, a ser obliga di cera e refineria pa motibo di su resultadonan empresarial.
    2. Mientras desaroyo di e proyecto mester a tuma luga, a yega na un acuerdo cu e compania Valero pa kibra e relacion entre Aruba y Valero pa Citgo haya e mercado local di combustibel y tambe servicio na transportacion maritimo y aereo.

    Esaki ta encera cu e sector di energia na Aruba, di cual economia di e pais ta depende, a cambia di operador sin consentimento di Parlamento.

    1. E acuerdo a ser firma den un tempo cu ya e gobierno Venezolano a haci uzo di su poder pa negocia y uza Citgo Petroleum Company como borg pa su debenan cu e resultado cu na 2016, e mes tempo cu a firma e contracto sin cana e caminda autorisa, Aruba tabata mara na un compania 100 porciento hipoteca como borg di debenan.
    2. E resultado directo di e accion a manifesta su mes den e hecho cu e acuerdo no a wordo ehecuta loke a hinca Aruba den un incertidumbre financiero y economico pero tambe den un crisis politico internacional di gran embergadura cu a afecta directamente e base social economico di e pais.
    3. E hecho cu e sector di energia, cu mester alimenta economia cu entrega di combustibel, a wordo afecta ta pone Aruba den un peliger economico, financiero y social grandi mientras e situacion financiero, economico y social ya a ser afecta.

    E situacion local y mundial ta prueba cu DIARIO na forma documenta a ehecuta su labor como matutino na e pais cu segun nos constitucion mester ta bon informa.

    Teniendo cuenta cu e forma cu e acuerdo a wordo negocia y introduci y e resultadonan sumamente negativo cu e tin pa presente y futuro di Aruba, DIARIO ta pidi Algemene Rekenkamer Aruba pa conforme su tareanan, realisa un investigacion oficial pa determina si e acuerdo ta cumpli cu e reglanan legal y di efectividad y integridad manera ley ta exigi y informa pueblo di Aruba riba e resultadonan di e investigacion di acuerdo cu e tareanan entrega na Algemene Rekenkamer Aruba.

    Cu e respet debido nos ta entrega un gran preocupacion di Aruba na Algemene Rekenkamer Aruba.

     

     

    - Advertisement -

    DUNA COMENTARIO

    Please enter your comment!
    Please enter your name here