Home Hudicial PG a pidi Hof pa mantene 15 aña di prison y TBS...

PG a pidi Hof pa mantene 15 aña di prison y TBS pa homber cu a mata rumannan Rishandroh y Eugene

225
0
SHARE
- Advertisement -

Hof a haya atencion di Gabriel pa cu su comportacion den Corte

ORANJESTAD (AAN): Dialuna mainta durante tratamento di e caso, Hof a hala atencion di e acusado Gabriel riba su comportacion. Gabriel no kier contesta preguntanan na forma drechi y e president di Hof a hala su atencion cu no ta Hof a apela e caso y pa Gabriel su mesun bon ta mihor e contesta preguntanan.

Procurador General interino (PG) a bisa Hof cu e ta haya Gabriel culpable y a pidi pa confirma e sentencia di 15 aña di prison y despues TBS cu ta encera tratamento medico obligatorio den un institucion sera.

   CONSENSHI TA REMORDE:

E acusado Gabriel Martin a presenta cu mannan y pianan geboei. Ta asina cu Gabriel a apela e sentencia di 6 Juli 2018 caminda el a worde condena na 15 aña di prison y despues TBS, na disposicion di Gobierno pa haya tratamento obligatorio. Despues di 10 aña e lo por cuminsa TBS. Si no tin un clinica lo mester busca clinica na Hulanda.

Hof a puntra Gabriel, kico ta e motibo cu a apela e sentencia. Gabriel a bisa Hof cu e no kier bisa nada y ta laga su abogado papia. E president di Hof a keda haci pregunta y na dado momento Gabriel a bisa cu e kier ayudo mas liher posibel. Abogado a bisa cu e apelacion ta contra e castigo. Por a nota cu e famianan di e victimanan no a presenta.

Durante tratamento di e caso, diferente biaha Gabriel no ta duna contesta manera Hof ta spera. Esey a haci cu president di Hof a remarca na Gabriel cu e ta duna impresion cu e no ta interesa riba e caso y no kier duna contesta. President di Hof a hala su atencion cu e mester realisa cu ta su apelacion y e mester duna contesta. E ta duna impresion cu ora Hof haci pregunta, ta molesti’e. Gabriel a bisa Hof cu e kier lubida di e caso y awor cu ta papia di e caso e ta molesti’e. Hof a bisa cu por compronde esey pero ta spera cu e ta duna contesta drechi.

   MATA Y DERA MUCHA:

Hof a mustra cu dia 22 November 2017, Rishandroh Anatasia (5) a worde hiba hospital pa su mama R.F. Dokternan cu a atende e mucha a constata maltrato severo. E mama R.F. a bisa cu e mucha a cay pero e dokternan no a kere.

Di inmediato a notifica Polis, Voogdijraad. Ta asina cu dia 24 November 2017, Rishandroh a fayece. E ora ey a constata cu su otro ruman Eugene no tey.

A detene R.F. y Gabriel y despues di investigacion profundo a bin haya e restonan di Eugene dera den mondi na Savaneta. Autopsia a mustra cu Eugene a worde mata na September 2017 y no October 2017 manera Gabriel a bisa. Tambe a constata cu ambos mucha tabatin fracturanan na nan curpa cu ta mustra cu nan tabata worde maltrata severamente.

Autopsia ta mustra cu e mucha Eugene a sufri lesion pisa na cabez cu a causa su morto. Gabriel a bisa cu el a dal Eugene duro na cabez cu consecuencia cu Eugene a dal su cabez contra toilette y fayece. Despues a bay dera e mucha den mondi na Savaneta.

Hof a mustra cu Gabriel a admiti di a maltrata e muchanan.

Hof puntra Gabriel kico tabata motibo cu a maltrata e muchanan. Gabriel a bisa cu awor e ta realiza cu el a bay di mas. Hof a haci un serie di preguntanan na Gabriel pero el a bisa cu el a duna declaracion amplio y no kier bay papia atrobe ariba e cosnan aki. A papia con el a kima Rishandroh cu awa cayente y cigaria y Gabriel no kier duna mucho cos. El a bisa cu el a bay basha awa cayente pasobra e WC a pega y awa a cay riba e mucha. Hof a puntra pakico no a hiba e mucha docter. Hof a remarca cu Gabriel no a hiba e mucha pa tratamento siendo cu e mucha a sufri quemadura serio.

Hof a puntr’e con a dal Eugene den baño. Gabriel a bisa cu a dal un wanta pero e momento ey e no a realisa cu e sla tabata hopi pisa. E mucha a dal su cabez contra conchi di wc y su siguiente dia a hay’e morto drumi riba cama. El a bisa cu awor e ta haya cu si e tabata sa cu e mucha lo muri e no a lag’e bay drumi y a hib’e dokter.

Pa loke ta Rishandroh, Gabriel a bisa cu e dia ey e no a dal e mucha sino algun dia promer. El a bisa cu el a dal e mucha un wanta duro. Gabriel a bisa cu e momento ey e no tabata sinti nada pero awor si e ta sinti fastioso y ta lamenta. Pero mester acepta cu e cos a sosode asina.

Hof a puntra pakico a maltrata e dama R.F. Segun Gabriel door di discusion e tabata dal R.F.   Hof a mustra cu tabatin un caso cu Gabriel a hinca R.F. y cu Gabriel mester a sigui curso di regulacion di agresion di Reclasering. Segun Gabriel el a bay 2 biaha so y no a bay mas pasobra e no kier tende nada di ningun hende.

Hof a puntra Gabriel pakico e no a bay busca ayudo. Gabriel a puntra con? Hof a remarca con por ta cu e ta bay dal mucha di 3 y 5 aña di e forma aki. Algo no ta bon! Tempo di e incidente e tabatin 5 aña bibando na Aruba. Hof a mustra cu Gabriel mester bebe remedi pa su problema mental pero e no tabata bebe esakinan.

Reclasering den su raport ta teme cu Gabriel lo bolbe ripiti mesun acto. Psycologo den su raport ta constata cu Gabriel tin problema di paranoide y cu Gabriel no por sin marihuana. El a conclui cu Gabriel no ta responsabel pa su actonan y teme cu e lo ripiti su acto. Psychiater a constata cu Gabriel tin problema mental cu sintomanan di psycopata. Psychiater ta haya Gabriel ta leve menos responsabel y cu mester TBS y den un institucion.

   EXIGENCIA DI PG:

PG a remarca e comportacion di Gabriel den Corte. E ta constata cu e kier a haya mas informacion pa mira con Gabriel a haci e delitonan serio aki pero no a haya esaki pasobra Gabriel no kier papia drechi. PG ta lamenta esaki.

El a mustra cu e caso aki a sacudi henter comunidad. Na opinion di PG., a base di relatonan medico y autopsia por conclui cu e muchanan a sufri sla hopi duro na cabez cu a causa nan morto. PG a mustra cu Gabriel mes a bisa cu el a dal Rishandroh di 5 aña cu wanta y mokete.

PG a bisa Hof cu Gabriel a duna declaracion detaya na Fiscal kico tur a sosode. Dia 22 November 2017 el a dal e mucha Rishandroh asina duro cu e no tabata reacciona bon. Su siguiente dia e mama R.F. a hib’e hospital. Gabriel tabatin miedo cu Rishandroh lo muri mescos cu Eugene. PG a mustra cu tin declaracion di un preso cu ta bisa cu den KIA el a conoce Gabriel kende ta haya kick cu e kier mata hende. Na opinion di PG, e comportacion aki ta cuadra cu loke psychiater a señala.

PG ta haya cu pa loke ta Eugene di 3 aña, Gabriel ta bisa October 2017 pero autopcia ta mustra cu ta September 2017. A keda proba Gabriel a dal Eugene mata. El a dal Eugene duro na cabez cu consecuencia cu e mucha a dal su cabez contra toilette. El a bay perde conocemento y despues a bay drumi y su siguiente dia nan a constata cu el a muri. Aki tambe Gabriel no a bay hiba e mucha dokter. Autopcia a mustra con duro a mucha a dal su cabez caminda e weso di cabez a kibra y desforma. Tambe a constata diferente fractura na curpa di Eugene.

   CASTIGO:

Teniendo tur esaki na cuenta PG a mustra tambe cu despues di a hinca R.F., Gabriel a sigui maltrata. PG, a base di e raportnan, ta teme cu Gabriel lo bolbe haci mesun cos. E ta haya e castigo di 15 aña di prison y poni bao TBS na su lugar. PG a expresa cu mester baha cu man duro pa mustra comunidad cu no ta tolera esaki.

Hof lo duna sentencia dia 16 di Mei 2019.

- Advertisement -

DUNA COMENTARIO

Please enter your comment!
Please enter your name here