Home Enseñanza Prome Minister a splica pakico a scoge Cacique Macuarima pa introduci Learning...

Prome Minister a splica pakico a scoge Cacique Macuarima pa introduci Learning Project

86
0
SHARE
- Advertisement -

ORANJESTAD (AAN) – Minister Presidente tambe a dirigi palabra, Diaranzon mainta na personal docente, alumno y mayornan di Cacique Macuarima School, tocante e Learning Project.

E mandatario a expresa cu el a bishita e school aki varios biaha y semper el a mira e animo y entusiasmo cu tin cerca e docentenan y e muchanan, y e deseo semper di haci algo mas.

E dignatario a menciona cu gobierno a wordo acerca pa e Comision di Mayor, pa yuda den un proyecto di airco.

E dignatario a expresa cu ya Comision di Mayor a haci hopi trabao hunto cu e maestronan, cu scol y alumnonan pa yega na fondo pa airconan.

E mandatario a bisa cu gobierno a pensa cu airco so, maske ta un alivio grandi, no ta duna tur loke a muchanan mester pa siña mas di dje.

E muchanan di awendia lo haci den futuro trabaonan cu ainda ni un sa kico nan ta. E mandatario a bisa cu tempo cu e tabata na scol basico, nan tabata sa cu por bira maestro di scol, polis, docter, abogado etc., cu ta trabaonan cu lo sigui existi.

Awendia tin hopi mas cos y mundo ta cambiando hopi lihe. Pesey gobierno kier pa e muchanan ta prepara pa e trabaonan cu lo bay bin. Y e mihor manera pa nan ta prepara ta door di haya les di computer tambe.

Meneer y juffrouwnan ta duna les, pero no tur ora ta riba un borchi ta mescos cu si nan ta wak via computer.

Pesey gobierno a dicidi den colaboracion cu Comision di Mayor y di scol, hunto cu Minister di Enseñanza, cu Cacique Macuarima ta e prome scol na haya airco, smart board y google. Juffrouw y meneernan tambe ta hopi entusiasma, e dignatario a expresa, y nan por duna les hopi mas facil tambe, cu manera e ta bay aworaki.

E mandatario a duna e muchanan un presentacion di e material aki, y a bisa nan cu esaki lo yuda nan bira mas sabi y pa nan haci nan best mas ainda.

Gobierno a scoge Cacique Macuarima School pasobra:

  1. Scol tin maestro y maestranan hopi motiva, y hopi interesa pa siña e muchanan cu e tecnicanan nobo aki, y esey ta hopi importante.
  2. E tin un comision di mayor cu ta sostene scol, y gobierno ta mas sigur cu si e docentenan, nan cabesante y e mayornan ta sostene e scol, e alumnonan ta bay cuida e material aki pa nan dura largo y no daña nan.
  3. Y lo mas importante, cu e alumnonan haya les den un ambiente cu nan gusta mas, pa pone mas atencion y presta mas na scol.

E mandatario a splica e muchanan cu e proyecto aki ta bay tarda un poco pa keda cla, pero sigur si pa e aña escolar nobo y kizas hasta prome pa e muchanan di 6de klas tambe por experiencia algo, prome cu nan bay for di Cacique Macuarima.

Finalmente Prome Minister a gradici e cabesante, maestronan, mayornan, pa a sostene gobierno cu e idea aki y Futura cu ta ehecuta e proyecto. El a yama e muchanan pabien!

 

 

- Advertisement -

DUNA COMENTARIO

Please enter your comment!
Please enter your name here