Home Parlamento Pueblo prepara cartera ya cu gobierno lo bin busca 30 miyon den...

Pueblo prepara cartera ya cu gobierno lo bin busca 30 miyon den di dos mita di aña

82
0
SHARE
- Advertisement -

Lider di fraccion Marlon Sneek

ORANJESTAD (AAN): Un gobierno cu a worde forma a base di engaño di pueblo, un gobierno cu a traiciona pueblo a base di promesanan falso, simplemente lo sobrebi solamente riba e rumbo di mentira y falsedad.

Lider di fraccion di AVP den Parlamento, sr Marlon Sneek a mustra cu pa e motibonan aki tambe, no ta ningun sorpresa di scucha minister di finansa Xiomara Ruiz Maduro, insisti den su declaracionnan, cu ta fraccion di oposicion ta bruha cos den otro y cu no a compronde e carta di IMF riba medidanan cu gabinete Wever Croes tin cu sigui tuma.

“Ta  un mentalidad cu nos a conoce no solamente di e minister di finansa pero di henter e gabinete Wever Croes, esta cu nan existencia como gobierno, a bira posibel cu traicion y mentira di pueblo, caminda practicamente ningun promesa haci durante di campaña electoral, a worde cumpli.

Ora cu nos scucha Minister Ruiz Maduro papia cu miembronan di nos fraccion kier bruha tera y a bay asina leu cu nos ta usa rapport di IMF bieu, lo ta bon pa e realisa cu ta dificil tapa y sconde cosnan asina for di pueblo.

E problema mas grandi di minister di finansa ta e hecho cu manera mi colega Arthur Dowers a señala, cu su persona no ta compronde nada di finansa di nos pais y ta loke minister presidente bise pa bisa, e ta declara.

Informacionnan riba un aumento di BBO te cu 10% ta un informacion cu a Sali for di propio seno di gobierno den su corespondencia cu IMF ya cu fuera di e medidanan ya tuma contra pueblo, gobierno tin mester di miyones ainda pa realisa un presupuesto cu nan mes a traha y caminda a sigura CFT cu nan lo produci miyones na entrada di impuesto.

Esaki tin cu sosode a  base di e di dos fase di e reforma financiero caminda e suma di 14 miyon ainda tin cu worde ranca for di pueblo pa cumpli cu e presupuesto y ta mesun gobierno aki a manda pidi IMF conseho y ideanan con pa yega na e placa aki.

Awor cu IMF a recomenda pa BBO worde aumenta a base di conseho pidi pa Prome Minister y Minister di Finansa,  awor ta tira tur e cos aki den scochi di fraccion di AVP, mientras cu tur informacion ta riba mesa.

Nos a bisa y nos ta sigui bise cu pueblo por spera cu pa dia prome di juni venidero, un serie di media ta worde introduci y pueblo ta bay perde mas placa for di den su cartera, pa un gabinete Wever Croes cumpli c’un plan di maneho cu te cu awor ta dirigi solamente na drecha status financiero di famia y amigonan, di sponsornan di campaña mientras cu pueblo lo keda pega den e miseria cu medidanan  aki ta causando.

No ta fraccion di AVP ta inventa of no ta papia berdad ya cu ora nos lesa e invitacion cu nos a ricibi pa e reunion cu IMF siman pasa diaranson, e ta bisa lo siguiente: “Economic and govenment’s fiscal plans”  pues e tema di e reunion tabata relaciona cu e plan economico y fiscal di gobierno, esta kico ta locual gobierno lo bay haci pa haya mas entrada.

Esey tabata e discusionnan cu nos a hiba cu IMF  y awor minister di finansa ta trata di bisa cu esaki no ta berdad, no no tin nada di hisamento y cu nada ta bay subi pero loke nos si sa ta cu  e gobierno aki a saca en total 270 miyon for di cartera di pueblo.

Na loonbelasting y inkomstenbelasting  gobierno supuestamente a reduci gasto pa pueblo pa despues bula  den cartera di tur hende hisando prijs accijns pa saca 10 miyon,  a hisa accijns riba bebida, a hisa accijns riba gasolin cu ta otro 10 miyon, a hisa grondbelasting cu ta otro 14.5 miyon, a hisa BAZV y a hisa crisisheffing cu ta BBO y en total gabinete Wever Croes a saca 270 miyon for di saco di pueblo y na su luga a duna un mangel di 16 miyon.

E reduccion aki manera tur hende sa, no ta yega na esunnan cu e mester yega pasobra esun cu tin un salario minimo por ehempel, no ta paga belasting riba su salario loke ta nifica cu e reduccionnan akino ta conta pa e grupo aki.

Yiust e homber chikito ta esun cu a haya golpi y awe un biaha mas nos ta mira cu presupuesto 2019 di gobierno di Evelyne Wever Croes, a informa parlamento cu den di dos mita di aña, e lo introduci un otro ley pa por bay haya 14 miyon Florin mas for di saco di pueblo.

No mester lubida cu ora a dicidi pa sigui duna e reparatietoeslag na nos grandinan, gobierno no a pone esaki riba presupuesto y esaki ta otro 14 miyon cu gobierno tin cu bay saca riba custia di pueblo pa por cumpli cu e promesa aki.

Pues un cos nos tin cu bisa, pueblo prepara pasobra gobierno lo Sali y busca 30 miyon Florin for di cartera di pueblo den di dos mita di aña,” lider di fraccion di AVP, Marlon Sneek a declara.

 

- Advertisement -

DUNA COMENTARIO

Please enter your comment!
Please enter your name here