ORANJESTAD (AAN) – Diasabra ultimo e tricolores di Solito ta derota Brasil jrs 3 pa 1 y ta acumula 32 punto, faltando dos rond pa asina RCA clasifica pa playoff 2018/2019.
Esaki sigur ta trece masha alegria pa e fanaticada tricolor. E cambio drastico a bini despues di Copa Betico, ora e conocido y exitoso entrenador Omar Tromp a bolbe bek na timon.
Omar a forma su cuerpo tecnico cu cara nan familiar manera Raymondt Pimienta, Glen Sambo, Felix Malmaceda manteniendo lider di ekipo Danny Kelly y Physio Icho Matos.
RCA cu for di 15 februari ta celebrando 85 aña, sin duda tin como meta conkista bek e titulo maximo. Alaves lo kier extende e dominio den Division di Honor pa locual ta e decada aki.
Desde 2011 pa 2019 soldatnan di Solito a yega 9 playoff, a hunga 6 final y a titula 4 biaha campeon di Aruba.
Directiva ta invita fanaticada completo pa jega stadion Diadomingo awor 6’pm ora RCA enfrenta Bubali.
