Home Turismo Ronella Tjin Asjoe-Croes tabata orador invita den e reunion mensual di ATSA

Ronella Tjin Asjoe-Croes tabata orador invita den e reunion mensual di ATSA

19
0
SHARE
- Advertisement -

ORANJESTAD (AAN):  Ronella Tjin Asjoe-Croes, CEO di Aruba Tourism Authority a acepta e invitacion di Aruba Timeshare Association pa participa na e reunion mensual di maart y pa haci un presentacion pa e miembronan basa riba Aruba’s Timeshare Profile y e Guest Experience Index pa e periodo di October 2017 te cu October 2018.

E documento a wordo prepara pa mehora e comunicacion corporativo cu stakeholders, asina Tjin-Asjoe a splica, y pa permiti cada hotel individual un overview detaya di nan prestacion compara cu otro timeshare hotel.

E informacion pa e presentacion ta deriva di un estudio di e carchinan di inmigracion y di exit surveys cu a wordo yena door di huespednan cu a keda na un hotel, cu a wordo compila den un documento completo. Luigi Heredia, presidente di ATSA y Gerente General di Costa Linda Beach Resort a felicita tur e hotelnan ya cu e scorenan di Timeshare pa 2018 a sali hopi halto.

Den e estudio nan a pidi e participantenan pa califica e propiedadnan caminda nan a keda den diferente aspecto manera amabilidad, limpiesa, seguridad, accesibilidad, profesionalismo, servicio y balor pa nan placa, den un escala di 1 pa 6, y e score ricibi di e propiedadnan Timeshare ta 5.51 cu ta ekivalente na 91.83% di satisfaccion, y e 3 categorianan principal ta amabilidad, limpiesa y seguridad.

Manera ta e caso cu tur e bishitantenan di nos isla, maart y juli tabata e lunanan mas halto pa e propiedadnan di timeshare, y te cu October 2018 e timeshare hotels  tabatin un total di 27.8% di tur e bishitantenan di Aruba versus e hotelnan cu a yega 51.8% di tur e bishitantenan. Y manera por a spera, e bishitantenan cu a keda na un timeshare hotel ta keda pa un periodo mas largo compara cu esunnan cu ta keda na un hotel.

Similar cu e hotelnan, gran mayoria di clientenan di timeshare ta procedente di Estados Unidos – 84%, y mayoria a bini di New York, Boston y Philadelphia.

Pa loke ta trata e Timeshare Guest Experience Index basa riba percepcionnan general di e bishitantenan y online reviews, e number ey a yega un impresionante 86.6 y ta basa riba un total di 2,822 comentario.

ATSA ta contento di sa cu timeshare ta sigui index e scorenan halto di satisfaccion compara cu otro hotelnan y propiedadnan all-inclusive.

Tjin Asjoe-Croes a comenta: “Nos ta agradecido na Aruba Timeshare Association pa e dialogo continuo y intercambio di informacion. Cu casi 30% di e bishitantenan di Aruba kedando na un timeshare hotel, e sector aki tabata y ta keda crucial pa turismo y e bienestar economico di Aruba. E scorenan di satisfaccion/experencia di e huespednan ta ariba di e averahe. Sigui asina! Bisando esaki, ta reconoce cu e sector aki tin cu keda evoluciona hunto cu e cambionan di e comportamento di e consumidor. Ekilibra e necesidadnan di nos bishitantenan actual cu e esunnan di e futuro biaheronan ta keda un di e prioridadnan principal.”

E potret ta ilustra parti di e reunion.

- Advertisement -

DUNA COMENTARIO

Please enter your comment!
Please enter your name here