Tension creciente den region Caribense y na Venezuela
*Informacion nobo di asistencia militar Ruso na Venezuela
*Grupo di Lima ta pidi Nacionnan Uni pa acepta Guaidó
ORANJESTAD(AAN)– E tension den region di Caribe y Latino Americano a crece mientras ainda tin incertidumbre riba e totalidad di e resultadonan cu e medidanan cu Merca ta introduci contra Cuba. Sigur ta cu dia 2 di mei 2019 Corte na Merca lo cuminsa atende casonan pa Cubanonan haya compensacion pa perdida cu nan a hiba ora nan mester a bandona Cuba y gobierno Cubano a haci su mes doño di e propiedadnan.
Cubanonan cu mester a bandona nan pais tambe por bay Corte pa pidi compensacion contra companianan stranhero cu a haci uzo di nan edificionan pa habri negoshi.
Esaki a e nucleo di problemanan serio cu por presenta dia 2 di Mei aunke te awor henter e situacion a keda den un silencio.
Union Europeo no a bisa nada mas riba su ponencia cu e lo sostene empresarionan Europeo cu ta haci negoshi cu Cuba y ta haci uzo di edificionan di Cubanonan.
Reino Hulandes, incluyendo Aruba, no a atende e topico aki, cu ta bira topico di dia na momento cu 2 di Mei empresanan Hulandes of Arubano, wordo confronta cu Cubano cu kier placa pa loke a pasa cu nan propiedad y ta acerca Corte na Merca.
Mientrastanto na Merca mes operadornan di tour, agentenan di biahe, companianan di crucero y publico en general, no sa na kico tene nan mes mientras e fecha ta acerca y Merca a bisa cu e ta kibra e posibilidad pa Cuba sigui beneficia di Merca riba tereno economico y pues tambe di turismo.
Na Venezuela mes e tension ta hopi halto. Grupo di Lima, cu ta paisnan cu ta Latino Americano cu ta sostene Presidente Juan Guaidó, a bolbe acerca Nacionnan Uni pa duna sosten na Guaidó cu ta e presidente actual segun constitucion di Venezuela.
Nan intervencion ta den noticia pero tambe informacionnan cu Rusia, cu ta exigi pa Merca keda for di Venezuela, a percura pa presencia di personal Ruso militar pa atende cu e instalacionnan contra misil. Aparentemente expertonan Ruso a conecta e instalacionnan aki na generator pa asina evita cu si coriente cay afo, nan ta stop di funciona.
Te ultimo momento DIARIO a trata na haya mas informacion riba posibel medidanan pa mas siguridad y informacion oficial pa Aruba, pero no a logra. Pa dia Prome di Mei, Guaidó ta mobilisa Venezuela cu ta alcansa culminacion di su crisis economico y financiero.
Ta wordo papia di un situacion nacional di desesperacion.
