ORANJESTAD (AAN) – E lider di e Sindicato di Trahadornan di Aruba (STA) Diego de Cuba, den entrevista cu DIARIO a elabora tocante e situacion integral di Arubus, incluyendo e Contrato Colectivo pa e trahadornan.
STA a reuni cu e management team di Arubus representa pa sr. Mohamed, cual e ta mira como un bon reunion, y na unda mayoria di e delegadonan a splica cual ta nan deseonan, kico nan ta sinti y kico nan ta mira como e problemanan cu e compania tin actualmente, y kico lo mester wordo drecha, na corto plazo.
E sindicalista a expresa cu e situacion di Arubus semper ta keda uno discutible, pero pa haci algo bon, mester tapa tur buraco cu tin y cuminza di nobo y esaki ta locual STA kier pa e compania aki.
De Cuba a declara cu tin asina tanto cos cu a keda atras den e compania, hopi deplorable, pa loke ta trata maneho di Arubus, cu e ta kere ta bay tuma su tempo e director nobo drecha e situacion aki, y e no por hacie sin haya e back up di gobierno.
E sindicalista a menciona cu el a wordo informa for di buro di e minister, cu tin 15 bus nobo na caminda y Dios mediante den luna di Juni nan lo ta na Aruba.
Den e mesun rosea, STA a bisa sr. Mohamed y riba esaki un carta a bay pa Minister di Infrastructura sr. Otmar Oduber, cu e sindicato ta bay solicita un reunion su persona conhuntamente cu minister Romero, y cu sr. Marlon Croes director di DOW.
E motibo ta cu e unidadnan di Arubus casi tur siman ta genera un gasto di casi 10 mil florin den tirenan so. Tin hopi caminda cu a wordo traha ultimamente, cu no ta tene cuenta cu e vehiculonan cu ta transita tur dia riba e camindanan aki. Por mira e rotondenan cu na hopi caminda ta hopi halto y skerpi y esaki ta causa daño na e autonan, tire di auto y sigur na e busnan.
Diego de Cuba por a compronde cu e busnan cu ta biniendo tin un grandura cu ta pas den Aruba su sistema, pero apart di esey mester bay papia riba e infrastructura di henter e pais Aruba, pa cu e compania di Arubus.
E sindicalista a señala cu no por ta asina cu ta bay inverti un cantidad grandi di placa den Arubus, anto e infrastructura no ta capaz di duna locual e busnan aki mester, pa nan por maniobra na un manera responsable y vooral e bushaltenan cu tin.
De Cuba ta kere cu no ta prome biaha cu e hendenan di Arubus ta papia tocante e tema aki pero e ta kere cu Minister Otmar Oduber si lo bay tuma nota y lo haci locual mester wordo haci.
E no ta algo cu ta bay sosode di dia pa anochi, pero e ta bay tuma su tempo. De Cuba ta kere cu si un infrastructura debido wordo planifica pa cu Arubus, e ora ey lo ta den bon direccion caba. El a subraya cu e paradanan di bus, e orarionan, etc., ta cosnan cu mester por wordo drecha. Pakico tanto bal busca busnan nobo si aki un par di aña nan ta na werki caba, pasobra cada bez cu e chofernan mester baha for di caminda nan ta bira astronauta cu tin cu baha for di un nave espacial riba e luna.
