Gobierno a firma acuerdo cu Universidadnan na Florida:
ORANJESTAD (AAN) – Minister di Enseñanza, sr. Rudy Lampe, a menciona den conferencia di prensa Diahuebs, cu un di e aspectonan mas importante den e maneho di gobierno, ta pa apoya e mayornan den e decisionnan pa e futuro di nan yiunan.
“Nos ta convenci cu mayornan mester haya mas opcion pa nan yiunan. Nan mester tin e opcion di bisa cu nan kier pa nan yiu haya tal sistema den enseñanza, y nos como gobierno mester crea e oportunidadnan aki” e dignatario a expresa.
Minister Lampe a informa, den e spirito di esaki, cu e siman aki a keda anuncia cu a firma un acuerdo di cooperacion cu universidadnan di Florida, na unda cu a comunica e grato noticia cu e studiantenan di Aruba, por haya facilidadnan manera esnan cu ta residi localmente, den e Estado di Florida.
Esaki ta inclui mas di diez Universidad renombra, manera Florida International University, e famoso FIU, entre otro. Tur ta den e marco aki cu studiantenan di Aruba por haci uso di e oportunidad di paga un fee pa studia den e universidadnan aki na un interes hopi mas abao cu loke ta exigi pa studiantenan internacional.
E dignatario a subraya cu e reduccion di casi 70% danki na e acuerdo aki, cu e studiantenan Arubano ta haya, ta nifica cu e Arubalening cu ta un maximo di 140 mil florin ta yega, y por bira un instrumento cu ta haci posible cu nos studiantenan local por opta pa bay studia na Florida.
Minister Lampe a acentua cu ta conoci cu Florida ta un destino popular pa e studiantenan local, pasobra e ta cerca di cas, mesun clima y e exito di nan estudio ta riba 80-90%. Kiermen cu casi tur studiante cu ta bay studia na Florida ta bolbe Aruba cu un titulo, un Degree.
El a remarca cu di esnan cu ta bay Hulanda, 20% so ta caba nan estudio cu exito; pues un diferencia enorme. “Pesey nos ta bisa cu mayornan mester tin mas opcion cu no ta solamente cu esun di Hulanda so tin. Nan por bisa cu nan kier un opcion, studiando por ehemplo, na Florida”, e mandatario a reitera.
Antes esaki no tabata posible mirando cu e fee cu mester a paga tabata asina caro cu a haci practicamente casi imposible cu e mayornan por a afford esaki. Aworaki e ta posible.
Minister Lampe a expresa cu gobierno ta hopi gradici na Minister Plenipotenciario sra. Joselyn Croes, cu ta trahando hopi duro den cooperacion tambe cu Ministerio di Enseñanza, pa haci esaki posible.
