Home General Trafico ta e final di careda di bida pa 1.35 Miyon hende...

Trafico ta e final di careda di bida pa 1.35 Miyon hende pa aña

141
0
SHARE
- Advertisement -

Analisis

Cifranan alarmante di Organisacion Mundial di Salud

E mayor causa di morto di hende entre 5 y 29 aña di edad

Aruba a drenta dos siman yena cu dianan di observacion y di fiesta. E temporada di Pasco Grandi, Dia di Rey, Dia di Obrero ta conoci pa cantidad di dia cu no tin trabou y ta ofrece mas dia pa actividad social.

Ta den e temporada aki entre otro, e riesgo pa accidente ta bira mas grandi. Pero di kico ta papia ora papia di riesgo di accidente pa salud di hende?

E peliger cu trafico ta representa pa salud di hende ta asina grandi, cu e Organisacion Mundial di Salud ta duna asistencia special a paisnan pa evita mas morto.

Den e rapport di december 2018, informacion ta ser duna di e riesgonan scondi den trafico.

Cada bes cu autoridad subi e maximo velocidad pa vehiculonan riba caretera cu un porciento, e riesgo di un accidente fatal ta subi cu cuatro porciento.

E peliger no ta solamente pa personanan cu ta participa na trafico, pero tambe pa personanan cu ta cana riba caya. E riesgo cu un peaton ta bira victima di un accidente fatal ta 4.5 bes mas grandi si e velocidad cu e vehiculo ta mantene subi di 50 kilometer pa 65 kilometer pa ora.

Ocupantenan tin 85 porciento mas chens di muri den un accidente cu no ta frontal, ora mantene e velocidad di 65 kilometer pa ora.

Anualmente, 1.35 miyon di persona ta perde nan bida den trafico.

Accidentenan di trafico tin un costo di 3 porciento di e produccion nacional bruto. Peaton, ciclista y motociclista tin mas chens di muri den un accidente di trafico.

Accidente fatal ta hala hopi atencion. Cifranan di e Organisacion Mundial di Salud ta mustra cu entre 20 pa 50 Miyon persona ta sufri accidente cu no ta fatal pero tin resultado di bida largo pa nan.

Victimanan, nan famia y pais mester carga ademas di e lesion sufri y e dolor cu ta ser causa, gastonan enorme pa tratamento. Bida di famia ta ser interumpi y afecta.

Tres porciento di loke un pais ta produci, no ta bay pa asuntonan placentero, pero pa consecuencia di accidente.

Velocidad halto, alcohol, droga ta causante directo di morto y destruccion di salud riba careteranan.

Negligencia ta un factor importante. Muchanan cu no ta den asiento special pa mucha. Falta di faha di siguridad. Ignora e reglanan pa bista helm.

Telefon mobil a cera un aliansa creciente cu e aumento directo di accidentenan. Careteranan cu no ta tene peliger na consideracion y distraccion di chauffeurnan ta riba e lista largo di riesgonan.

Vehiculonan cu ta peligroso pa trafico ta un problema serio mescos cu falta di formanan ordena pa crusa caya.

E hecho cu no ta polis ta adverti pa trafico insigur, pero e instancia cu ta vigila salu di poblacion mundial, ta confirma e peliger cu trafico ta contene pa bida y salu di hende.

DIARIO ta cumpli awe cu e responsabilidad pa adverti comunidad cu mester ta informa, manera e organisacion ta trece dilanti.

Awor palabra ta na tur persona, cu ta asina preocupa pa nan salu. Comportacion den trafico ta decisivo pa salud y felicidad di hende, cu mester dicidi pa nan mes, nan famia, nan comunidad y nan victimanan cu lamentablemente no ta haya oportunidad pa protesta ni contesta ora nan bida ta ser poni na peliger.

- Advertisement -

DUNA COMENTARIO

Please enter your comment!
Please enter your name here