Home Hudicial Tur sospechoso den caso di importacion di 110 kilo di cocaina declara...

Tur sospechoso den caso di importacion di 110 kilo di cocaina declara liber

115
0
SHARE
- Advertisement -

Hues a cuestiona cu falta di investigacion di Polis a causa

ORANJESTAD (AAN) – Ayera mainta Fiscal a haya un baño di awa frieu ora cu Hues a bisa cu e ta haya cu no tin suficiente prueba pa mustra cu realmente e grupo di cuater persona ta envolvi den importacion di 110 kilo di cocaina y ta declara nan liber. Di otro banda e grupo di cuater tabata sumamente contento. Na Maart 2019 tratamento di e caso a tuma lugar caminda Fiscal a bisa cu e ta haya A.C., R.Z., K.W., G.R. culpable di importacion y tabatin 110 kilo di cocaina hunto cu nan.

EXIGENCIA DI FISCAL

Na Maart 2019, Fiscal a bisa Hues cu e ta haya legalmente proba cu dia 19 Mei 2018 e grupo A.C., R.Z., K.W. y G.R. a importa 110 kilo di cocaina y Polis a haya e droga na cas di A.C. na Casibari. Esaki ta mas cu mey miyon dollar balor. Esaki despues di haya yamada cu tin droga a yega y tabata wordo baha na cas. Ademas di e droga, a haya boto di pisca chikito cu rato promer a yega Aruba. E droganan tabata den dos icejug color blanco. E icejugs tabata ariba e boto cu a yega na e beach dilanti cas di Gobernador. Fiscal ta haya cu tabatin henter un organizacion pa trece e boto riba tera y hiba Casibari. A haya un I Phone blanco na e cas cu un cantidad di informacion hopi importante. E cellular aki tabata di un tal Angelo cu tabata den contacto cu G.R. For di whatsapp a ripara cu for Januari 2019 tabatin contacto.

E mensahenan tabata mustra bon cla con e importacion di 19 Mei 2018 mester a sosode. Fiscal a remarca cu cada vez e sospechosonan tabata cambia nan declaracion. Fiscal a mustra cu promer G.R. a admiti tur combersacionnan pero awor den Corte e ta bisa cu Polis a cambia su declaracion di tal manera pa mustra cu e ta envolvi. Fiscal a bisa cu e no ta kere G.R. No tin ningun motibo pa duda den trabou di Polis. Fiscal a bisa cu si Hues ta duda lo ta bon pa scucha e agentenan. Fiscal ta haya cu G.R. tabata envolvi den organiza e importacion di e 110 kilo di cocaina. A.C. a pone un trailer disponibel y tabata core tras di e pick up. El a cumpra dos icejug blanco algun dia promer. Na su cas a haya e lote di droga.

Pa loke ta R.Z. y K.W. e pregunta ta si nan ta envolvi y tabatin intension riba e importacion di droga. Fiscal a mustra cu no ta asina cu si e sospechoso desmenti esey kiermen cu e intension no tey. Ta bon cla kico R.Z. a haci. El a fia su pick up pa saca e boto. El a saca e boto for di lamar na beach. A laga dos Venezolano drenta su pick up. Su trabao tabata importante pa e operacion. Fiscal a bisa cu e no ta kere cu R.Z. no tabata sa di nada. K.W. tabata envolvi cu e boto. E ta complice. El a admiti cu e tabata hunto cu G.R. y a core e pick up hiba cas na Casibari. Tambe Fiscal ta hay’e culpable di incubrimento di equiponan electronic di DJ. El a admiti di a cumpra e equiponan pa 2 mil florin for di un Surnameo y no sa unda e ta biba.

EXIGI CASTIGO

Na opinion di Fiscal, si mira e cantidad aki, un gran parti lo wordo exporta. Droga ta causa un cantidad di criminalidad. Droga ta veneno pa comunidad. Fiscal a bisa cu G.R. y A.C. tabatin funcion organizatorio y a exigi 7 aña di prison pa cada un. Pa R.Z., kende recien tabata castiga pa droga, Fiscal a exigi 7 aña di prison y pa K.W. 5 aña di prison.

SENTENCIA

Ayera mainta Hues a bisa cu e ta rechaza peticion di abogadonan pa declara Fiscal no admisibel. Hues a mustra cu ta den masha poco caso Corte Supremo ta bay di acuerdo. Hues no ta haya suficiente argumenta di parti abogadonan pa por declara Fiscal no admisibel. Na opinion di Hues, no a sali na cla cu durante investigacion Fiscal a viola norma.

FALTA MAS PRUEBA

Hues a mustra cu for di e documentonan mester saca afor si e droga haya na cas di A.C. na Casibari ta procedente di e boto di pisca chikito cu a yega na e beach banda di cas di Gobernador. E tata di A.C. a bisa cu un jeep a busca e boto chikito mas o menos 6’or di mainta. Hues a remarca cu no tin imagen di camera y tampoco tin informacion di radar cu e boto a sali for di awanan territorial di Aruba y tampoco cu un boto lo a trece cos pa e boto. E distancia entre Aruba y Venezuela ta hopi y pa e boto a bay busca e droga den un periodo di 3 ora, esey no por.    Hues a mustra cu for di e camera di seguridad di un restaurant, por mira cu un boto a yega na e beach cu dos icejug grandi color blanco. Hues a bisa cu e pregunta ta, si e icejugnan aki tabata contene droga y si ta eseynan a wordo haya na e cas na Casibari. Na e cas a haya 3 icejug. Un ta grandi y un mediano y un blauw.

FAYO DEN INVESTIGACION

Hues ta haya cu no tin prueba cu e icejugnan cu a haya na cas di A.C. ta esnan cu tabata den e boto di pisca. Ta parce cu promer cu e boto a yega na cas di A.C. tabatin dos icejug blanco grandi. Hues ta haya cu Polis no a laga haci investigacion si e verf cu tabatin den boto ta esun cu tin na e icejugnan. Tampoco no a haci investigacion cu cacho anti droga cu tabatin droga riba e boto. Na opinion di Hues, no tin prueba cu e dos icejug riba e boto tabatin droga. Door cu e razia na Casibari a tuma lugar mas o menos 12.30, Hues ta haya cu e tres personanan riba e boto por a bay cu e icejugnan. Hues ta haya straño cu tres dia despues di e razia, a confisca e boto. Polis no a saca potret con e boto tabata, kico ta mira den e boto. Hues a bisa cu segun Fiscal e yamadanan whatsapp, G.R. ta admiti di a haci tur cos pero Hues a scucha tur e combersacion y whatsapp y e no ta haya cu ta papia di transportacion di cocaina.

Hues a remarca cu pa bay interpreta un combersacion y bisa cu ta relacion cu importacion di droga no ta suficiente. E combersacionnan di whatsapp mester ta acompaña cu pruebanan. Den e caso aki no tin prueba cu e boto tabatin droga. Hues a mustra cu G.R. dia 12 November 2018 durante interogacion a desmenti diferente biaha. Full na final di e interogacion, Polis a haci un resumen di nan sospechonan. Segun e resumen, G.R. lo a haci preparacion na Mei 2018 pa importacion di droga y 30 kilo ta pa G.R. y e resto pa A.C. Hues ta haya cu Polis no a sigui investiga mas riba declaracion di G.R., pa sa con e droga a drenta y unda e droga ta awor. Polis a djis bay tras di loke G.R. a bisa. Hues ta haya e declaracion G.R. no suficiente pa bisa cu G.R. ta admiti tur cos.

TUR SOSPECHOSO DECLARA LIBER

Esaki ta trece cune cu no tin suficiente prueba cu riba e boto tabatin droga y cu hunto a transporta e droga. Tampoco cu G.R., K.W. y R.Z. tabatin droga cu nan. Hues a bisa cu e pregunta ta surgi si A.C. ta responsabel pa e droga haya na su cas. Tin testigo cu a bisa cu a mira dos icejug den e patio.

Hues a mustra cu den e cas ta biba diferente hende. Tur hende por drenta y sali e tereno door cu e porta di cura no ta na lock. Hues ta haya cu no por saca afor cu A.C. tabata sa cu den e dos icejugnan tabatin droga. E solo hecho cu A.C. tabata sinta cu dos Venezolano bou patio banda di e icejugnan, no ta bisa cu e sa di droga.

Hues a conclui cu no por prueba cu A.C. tabata sa di e droga y no por prueba cu e boto tabatin droga abordo. Hues a declara tur cuater sospechoso liber. El a condena K.W. pa incubrimento di aparato di DJ na 100 dia di prison, cual el a sinta caba. Tur esnan presenta den sala di Corte tabata contento cu excepcion di Fiscal. Tempo lo mustra si Fiscal lo apela e caso. DIARIO por a compronde cu lo ta dificil pa bay apela pasobra tur prueba a wordo destrui.

 

- Advertisement -

DUNA COMENTARIO

Please enter your comment!
Please enter your name here