Home Gobierno US$ 260 miyon a sali pa refineria di Aruba pero 80 so...

US$ 260 miyon a sali pa refineria di Aruba pero 80 so a yega

448
0
SHARE
- Advertisement -

Segun ehecutivonan di Guaidó den PDVSA:

* 180 miyon a disparce na caminda

ORANJESTAD (AAN) – Minister Presidente, den conferencia di prensa di gobierno, dunando un update encuanto e situacion di e refineria di Aruba, el a reitera cu e situacion ta birando cada bez mas dificil.

E placa no ta pasando loke ta nifica cu e refineria no ta hayando fondo y asina e compania no por sigui mantene e trahadornan mas den servicio, y a cuminza retira mas hende.

E dignatario a referi na un encuentro di un delegacion di Aruba cu ehecutivonan di PDVSA na Miami, unda e combersacionnan a bay den bon sentido. E reunion aki tabata cu dirigentenan nobo di PDVSA, cu a wordo apunta pa Juan Guaidó, presidente interino di Venezuela.

Minister Presidente a reitera cu den su combersacion cu Juan Guaidó siman pasa, el a splike cu ainda e no tin e control di PDVSA, pero e funcionarionan cu a reuni cu e delegacion di Aruba ta hendenan di Guaidó.

E dignatario a duna di conoce cu loke a bin padilanti ta algo cu e no a tene cuenta cune, adelanta y a comenta cu e grupo nobo cu a drenta den PDVSA awor, tin un desconfianza hopi grandi riba e proyecto di Aruba.

“Segun nan calculonan for di e cuentanan bancario di PDVSA na Merca, 260 miyon a wordo inverti den e refineria na Aruba; sinembargo, aworaki cu nan ta wak bek, ta 80 y pico miyon so a wordo inverti na Aruba. Pues, 260 miyon dollar a sali for di e cuenta bancario y 80 y pico a yega. Na caminda 180 miyon a disparce”, Minister Presidente a señala.

E dignatario a indica cu esaki ta algo cu ta crea hopi desconfianza di banda di e grupo Guaido di PDVSA, y e desconfianza aki ta riba tur tereno.

“Desconfianza cu si di 260 miyon 80 miyon ta yega, kico ta pasa cu 15 miyon si nan lante aworaki? Si nan coopera cu e licencia di OFAC aworaki y laga e 15 bay, ta kico ta yega Aruba y con hopi no ta yega?” E mandatario a expresa.

“Pero mas importante, e desconfianza cu nan tin ta cu nan sa cu ta hendenan di e regimen di Maduro cu ta encarga cu PDVSA, ta responsable pa e desaparicion di e placa, pero den nan pensamento Aruba sea a facilita pa comete fraude cu e placa aki, of tin ex-mandatarionan cu tambe ta involucra den esaki” Prome Minister a bisa.

Premier Wever-Croes a agrega cu por imagina cu ora di drenta un reunion na unda ta bay papia cu e ehecutivonan riba 15 miyon dollar cu tin cu bin pa yuda algun mama y tata di famia mantene nan trabao den e refineria, anto e delegacion di Aruba ta haya su mes cu e desconfianza di tal magnitud, esey ta cambia henter e escenario.

“Esaki ta treciendo poco tension di ambos banda. Di banda di e refineria di Aruba (RdA) nan ta insisti cu tin 80 miyon dollar inverti den e proyecto aki y no 260 miyon manera ta wordo bisa. Pues na un caminda e 180 miyon a bay, y esey a crea desconfianza den e hendenan nobo cu a drenta PDVSA. Nos a kere cu hende nobo ta mas confianza, pero tin hende nobo y menos confianza” e dignatario a enfatiza.

- Advertisement -

DUNA COMENTARIO

Please enter your comment!
Please enter your name here