Home CORTE 14 aña di prison exigi pa Maduro cu a tira Harmon Girigorie...

14 aña di prison exigi pa Maduro cu a tira Harmon Girigorie mata

231
0
SHARE
- Advertisement -

ORANJESTAD (AAN) – Manera DIARIO a publica, ayera Corte den Promer Instancia a trata e caso penal cu Ministerio Publico a cuminsa contra Ilbert Maduro, kende ta wordo acusa cu dia 16 di October 2018 a tira mata Harmon Girigorie. Den sala di Corte tabatin hopi familiar di e victima y na dado momento refuerzo di seguridad a bin pasobra algun familiar a cuminsa tira palabra pa e sospechoso Maduro. Fiscal ta haya Maduro culpable di a tira diferente biaha riba Harmon Girigorie, en total 6 tiro di cual 3 a herida Harmon. Un tiro tabata den cabez, cual a causa su morto. Fiscal a exigi 14 aña di prison.

 

REFORZA SEGURIDAD

Den sala di Corte tabata presente miembronan di famia di e defunto Harmon Girigorie. Por a mira tambe cu durante tratamento di e caso, e mama di e victima tabata yora hopi pa perdida di su yiu. Algun familiar a cuminsa tira palabra pa e sospechoso y esey a haci cu a reforza e cantidad di miembronan di seguridad di Corte, CEA y hasta agente di Polis tabata presente. Esaki a haci cu e miembronan di famia a comporta nan mes.

 

DISCUSION A CABA DEN TIRAMENTO

Ta asina cu durante e interogacion di Hues, Maduro a admiti di a tira mata Harmon Girigorie riba 16 di October 2018. Esaki despues cu tabatin un discusion entre e y Harmon. For di tratamento di e caso por a compronde cu tabatin un problema familiar, caminda e pareha di Maduro tin un yiu cu Harmon y cu varios biaha Harmon lo a bay na e cas di Maduro y causa problema.

Dia 16 di October 2018, Harmon tabata den Julio’s Bar Restaurant na San Nicolas y tabatin un momento cu el a sali bay y despues di un rato a bolbe. Segun e sospechoso Maduro, dia 16 di October 2018 anochi, Harmon a bolbe presenta na su cas y tabata haci fastioso y despues a bay. Esey a pone cu Maduro a dicidi cu e dia ey e asunto ta caba. El a bisa su pareha cu e ta bay papia cu Harmon pasobra e no kier e molester aki sigui sosode.

 

A TIRA 6 BIAHA

Maduro a coy su revolver carga cu 6 bala y a bay na e Julio’s Bar Restaurant caminda el a papia cu Harmon. Sinembargo na dado momento discusion a bay for di man y Maduro a saca e revolver y a los un tiro di advertencia riba Harmon.

Harmon a core drenta e bar, caminda Maduro tabata sigui su tras y a los un otro tiro. Den e bar Harmon a coy un kruk di bar y manda riba Maduro y a sali core bay. Maduro a sigui Harmon su tras. Harmon a bay na cas di un bisiña caminda el a purba habri porta pa drenta pero e porta tabata na lock.

Aki ta caminda cu Maduro a los cuater tiro di cual tres a herida Harmon na parti robez di su curpa. Un tiro a herida su bariga, un otro tiro su ripchi y un tiro den cabez na banda di orea. Patologo a constata cu e tiro na cabez tabata esun fatal.

Abogado mr. Lejuez a puntra Maduro, pakico el a bay cu e revolver. Maduro a bisa Hues cu el a bay cu e revolver pasobra Harmon den pasado a yega di tira y ta wordo considera peligroso. Ademas di esey Harmon ta mas grandi cun’e y ta bringa MMA.

Abogado mr. Lejuez tambe a puntra Maduro, pakico el a tira. Segun Maduro, el a perde cabez y a haci cosnan cu awor e ta lamenta. Aparentemente e tabata den un estado di nervio pisa e momento. A wordo mustra cu hopi aña pasa Maduro a bira victima di tiramento na Curacao. E tabata di vacacion na Curacao y tabata riba brommer cu un amigo. Na dado momento un auto a presenta y esnan den auto a cuminsa tira riba e amigo, kende nan tabata busca pa mata. Tiro a coy Maduro, kende a cay for di e brommer. E amigo a sigui core pero a wordo asesina.

Maduro a sufri un tiro den su pia abao y el a bira hopi malo door cu e pia a cuminsa putri. E mester a bay Hulanda y despues di 1 aña di tratamento el a recupera. Abogado mr. Lejuez a bisa Hues cu probablemente na momento di discusion, Maduro lo a bay den un estado di nervio caminda e lo a corda kico a pasa cun’e na Curacao y a actua asina.

Ta asina cu Maduro a pidi dispensa pa loke a sosode.

EXIGENCIA DI FISCAL

Fiscal ta haya legalmente proba cu Maduro a tira mata Harmon Girigorie riba 16 October 2018. Fiscal a bisa Hues cu e caso aki a conmove henter comunidad. Maduro a sali for di cas cu e revolver pa bay reclama Harmon. Discusion a bay for di man y Maduro a saca arma y tira. Fiscal ta condena totalmente loke a sosode. El a bisa cu Maduro a kita bida di un ser keri di e famia. Fiscal a exigi 14 aña di prison, kitando e tempo cu Maduro ta sera den KIA.

Hues, despues di a scucha e defensa di mr. Lejuez a sera tratamento di e caso y a bisa cu dia 7 Juni 2019 lo tin sentencia.

- Advertisement -

DUNA COMENTARIO

Please enter your comment!
Please enter your name here